Mizo badminton team kutah medal 13
Mizo badminton team kutah medal 13
August 16-19, 2023 chhunga Itana-gar, Arunachal Pradesh-a khelh zawh tak Yonex-Sunrise North East Zone Interstate Badminton Championship 2023-ah Mizoram aiawha tel Mizo shuttler-te’n gold medal panga, silver medal pahnih leh bronze medal paruk an vaw chhuak.
He tournament hi Arunachal State Badminton Association (ASBA)-in a thleng a, North East state hrang hrangte badminton hmanga inelna lian ber niin, team leh open-ah inelna buatsaih a ni.
Open championship-ah hian Joseph VL Ringngheta leh Laldingpuiite tangdun chuan mixed doubles category-ah gold medal an la a; C. Lalramzauva leh Lalrem-puiite’n category pahnihah ve ve gold medal lain, H. Lalthazuala chuan Under-19 Boy’s Singles category-ah gold medal a dawng.
Junior category bika gold medal lak theihna paruk zinga pangaah Mizoram aiawhte’n gold medal an hlapchhuak a, pakhatah silver medal an vawchhuak bawk.
Mizo shuttler-te’n North East India an awp tan mek a, India ramah pawh a tha berte zinga mi an ni chho tan mek a ni.
Mixed doubles-ah Jojo-a, Kulikawn leh Dingpuii, Mission Vengte’n seeded no 1 ni chungin inelna an hmachhawn.
Final hmuhnawm takah Manipur player tha pahnih L. Unikumar Singh leh Naorem Purnima Devi-te tangdun chu 21-13, 17-21, 21-18-in deciding game-ah an hneh a ni.
Under-19 Boy’s Singles category-ah Mizo rawlthar pahnihin final an khel a; Mizoram champion ni mek H. Lalthazuala, Chanmari West chuan seeded no 2 ni chungin inelna a hmachhawn a, he tournament-a seeded no 4 Saitluangpuia Sailo, Ramhlun Venglai chu final-ah hian 21-16, 21-13-in a hneh a ni.
Saitluangpuia hian semi-final-ah he tournament-a seeded no 1 Himanash Sekhar Das chu a vaw tla.
Badminton Association of India-in a hriatpui Mizoram pawna badminton inelna lianah Mizo rawlthar pahnihin final an khel thei hi thil chhinchhiah tlak tak a ni.
North East zone tournament lian berah C. Lalramzauva, Durtlang a chetha hle a, category pahnih Under-19 Boy’s doubles leh Under-19 Mixed doubles-ah final lut ve vein, a partner-te a champion-pui ve ve a ni.
U-19 BD category-ah hian Lalnuntluanga, Serchhip nen tangdunin Lobsang Choidrup leh Lobsang C. Sherdang-te inkawp chu Ramzauvate thiandun hian 21-9, 21-15-in awlsam takin an hneh a; U-19 XD category lamah pawh Durtlang naupang Ramzauva leh Lalrempuii, Serchhip tangdun chuan final-ah Udayan Saikia leh Anushree Mahanta inkawp chu 21-17, 21-10-in, straight set bawkin an hneh leh a ni.
Serchhip tleirawl Lalrempuii hian Under-19 Girls doubles category-ah Abigail Lalthazuali, Saron Veng nen tangdunin gold medal an vaw chhuak bawk.
Anni pahnih inkawp hian hemi category bikah seeded no 1 ni chungin bul an tan a, final thleng hian an tumpuite straight set vekin an hneh a; final-ah hian Manipur player Konsam Gunjan Devi leh Sananu Meisnam-te chu 21-11, 21-15-in harsa lo takin an hneh.
Under-19 Girl’s singles-ah Lalrinkimi, Mission Vengin semi-final-a seeded no 3 Montily Pul a vuak thlak hnu final-ah seeded no 2 Shantipriya Hazarika chu 15-21, 19-21-in a hneh zo ta lo a, silver a dawng. Unseeded ni chunga final a thleng thei erawh chhinchhiah tlak a ni.
He category-ah vek hian Abigail Lalthazuali chuan bronze medal a dawng a, semi-final-ah champion zui ta Shantipriya Hazarika hi 13-21, 19-21-in a hneh lo hlauh.
Women’s singles-ah Ramngaihzuali, Ramhlun South chuan bronze a dawng a, semi-final-ah seeded no 1 leh champion zui ta Ksh Maheshwari a hneh zo lo.
Men’s doubles inelna hautak zetah Lalrin-awma, Bungkawn leh Laldintluanga Tlau, Republic Veng-thlangte tangdun chuan bronze awrhin, Women’s doubles-ah Lalvenhimi, Thakthing leh Zothansangi, Saron Vengte chuan bronze medal an la bawk.
Team inelna lamah Mizoram Junior Boy’s team leh Girl’s team chuan bronze medal an dawng ve ve bawk.