Mizo hnam insingsak lai hi inenchhin hun a ni lo – Lalruatkima

Khawvel leh Mizo hnam insingsak mek lai hi inenchhinna hun a ni loa, nationalism meichher chhitute sawrkar leh a ngai tih MNF adviser Lalruatkima chuan a sawi.
Thawhtanni zana Aizawl West II bial huamchhung Dinthar MNF Unit I Campaign office a hawnnaah bialtu MLA ni bawk Lalruatkima chuan, khawvel a insingsa mek a, Mizo hnam ngei pawh a insingsa mek a. Buaina hrang hrangin Zofate min chim a, Myanmar rama Zofate an buai a, Manipur an buai a, Bangladesh an buai a. Hnam insingsak lai, hun harsa tawh lai hi inenchhin hun a ni lo, tia sawiin, “Pathian leh kan ram tana nghet taka ding, ram hmangaihna avanga martar-te thisena nemngheh party hi a sawrkar leh ngei Zofate tan a tulin a tul. Nationalism meichher chhitute kan sawrkar leh hi a ngai,” a ti.
MNF sawrkar hnuaiah hun harsa tak Zoramin a hmachhawn tih a sawi a. Chuti chung chuan Pathian leh mipui zarah kan dam khawchhuak thei tih sawiin, “Kan damkhawchhuak thei a ni mai loa, hmasawnna hna nasa takin kan thawk thei a ni. Hun tha loa ram hruai tura min ring tawktu Pathian hian, hun thaa kan sawrkar hi a remti em em ang tih ka ring tlat a ni,” a ti.
Zirna chu hmasawnna hnuk a nih hriain MNF sawrkarin a ngaipawimawh a. Dinhmun sang zawkah sikul tam tak an hlangkai a. thalaiten ruihhlo buaipui loa infiamna leh hriselna lam an buaipui theih nan sport lamah pawh hma an la nasa hle bawk tih Lalruatkima hian a sawi. “Zirna leh sport hmangin ruihhlo do kan tum a. Thalaite intodelh nan leh kawng hrang hrangah hma an sawn theih nan, an khawvel thar din turin theihtawp kan chhuah zel dawn a ni,” a ti.
Sawrkar hmasa lama an la tih theih loh, ni za inhlawhnaah ni za kan inhlawh theih thu te, kuthnathawktu leh harsa zawkte tan SEDP pawh an sawrkar leh chuan an sem chhunzawm tur thu te a sawi bawk.