Mizo nationalism min tuhtute an hlu takzet – Er Lalrinawma

Mizote thinlunga nationalism tuhtu Pu Laldenga leh hruaitu hmasate chu Mizoram tan an hlu takzet a, an hlutna hi thangtharten kan la hmuh belh deuh deuh dawn tiin MNF hruaitu Er Lalrinawma chuan a sawi.
Thawhtannia Mizo Hnam Runa inkhawmah MNF general secretary Er Lalrinawma chuan, Pathianin hnama min dinna chhawmnung tur leh tungding zel tura khawvel hriat thama sul lo sutu leh thih huama inpe, Pu Laldenga leh hruaitu hmasate, hnam pasalthate chu vawiina Mizoram tan hian an hlu takzet a. An hlutna hi thangtharten an la hmuh belh deuh deuh dawn tih a sawi.
“Khawvelah hian humhalh loh hnam leh tawng tam tak a bo tawh a, a bo mek zel a, chutiang laka kan himna tura Pu Laldenga leh a hnungzuitute chi tuh Mizo nationalism hi a duah chho zel dawn. Chumi chhawmnun hna thawh chu kan hna pawimawh ber zing ami a ni,” a ti.
Pathianin chenna tur ram min pe a, hnamah min siam a, kan hnam ziarang kan hnualsuat tur a ni lo, tiin, khawvelin min hlutpui zawk tih hria in, chhuang takin kan chhawmnung zel tur a ni tih a sawi bawk.