Mizo player pahnih lansarhna Indian Super Cup
January 9-28, 2024 chhunga khelh zawh tak 2024 Indian Super Cup final-ah Pathianni khan 3-2-a defending champion Odisha FC hnehin East Bengal FC kutah trophy a lut a; Mizo player Isak Vanlal-ruatfela (Odisha FC) chu Kalinga player of the tournament atan thlan niin, best goalkeeper-ah Isaka team-mate Lalthuammawia Ralte thlan a ni bawk.
Bhubaneswar khawpuia Ka-linga Stadium-ah supporter nei tha team pahnih hian Pathianni zan khan game boruak sang tak khelin, club pahnihin red card leh penalty an chawi ve ve a; extra time minute 111-naa captain Cleiton Silva goal hmangin Carles Cuadrat-a team an dingchang ta zawk hram a ni.
East Bengal FC hian kum 11 chuang eng trophy mah hawn loa an hawihil hnuah major trophy lawm tur an nei ve leh ta a; Red and Gold Brigade kuta national-level trophy a luh hnuhnunber chu September 2012 daih tawh kha niin, khami tum khan Siliguri-a Kanchenjunga Stadium Federation Cup final-ah 3-2 bawkin Dempo SC an hneh a nih kha.
Tuntum hi Indian Super Cup vawili an huaihawtna chiah niin, Mizo footballer pahnih hian champion lai Odhisa FC chu an title kawl lai humhimpui zo lo mah se mimal chawimawina an hlawhchhuak ve ve.
Best Goalkeeper of the tournament atana thlanchhuah kum 31 mi Lalthuammawia Ralte hian 2024 Super Cup match nga a khelhah goal chhuah loh match lo neiin, Sergio Lobera team tana khel tha langsar pakhat a ni.
Odisha FC winger Isak Vanlalruatfela pawh Kalinga Player of the Tournament award dawng thei khawpin a khel tha.
Kum 22 mi hian tournament chhungin goal khat a khung a, assist vawikhat nei bawkin, Indian football-a hmalam hun nei eng tak a nihna hi 2024 Indian Super Cup-ah mai ni loin Indian Super League season kal mekah pawh a lantir kal zel a ni.
Best Defender atana thlanchhuah chu kum 26-a upa East Bengal FC Jordanian center-back Hijazi Maher niin, Odisha FC defensive midfielder Ahmed Jahouh chuan goal venhim lam buaipui chungin goal thum a tilut tling a, chu’ng zingah chuan extra time hruai thlengtu minute 99 penalty a chhuihluh a tel a; tour-nament chhungin kum 35 mi Moro-ccan International hlui hian assist vawihnihah inrawlhna nei bawkin, runners-up an nih theihna kawnga a thawhhlawk avangin Best Midfielder award hlan a ni.
Top goal-scorer award chu final-a an champion-na goal chhiartela tournament chhunga goal nga khung tling East Bengal FC captain Cleiton Silva kutah lutin, mimal lawmman hrang hrang hian tangka fai cheng 2,50,000 theuh a keng tel.
A thlengtu leh runners-up ni bawk Odisha FC kutah Rs. 15,00,000 lutin, champion East Bengal chuan Rs. 25,00,000 an dawng thung.
2024 Indian Super Cup hi he tournament season lina niin, India rama national knockout football competition season 42-na a ni nghal bawk.
Mimal lawmman dawngtute
Best Goalkeeper – Lalthuammawia Ralte Odisha FC
Best Defender – Hijazi Maher East Bengal FC
Best Midfielder – Ahmed Jahouh Odisha FC
Highest Goalscorer – Cleiton Silva East Bengal FC
Kalinga player of the tournament – Isak Vanlalruatfela Odisha FC