Mizo tawng leh a behbawm…
Mizo Language Development Board leh Central YMA tang dun chuan tunhnai khan YMA branch chanchinbu enkawltute pualin Mizo tawng hman dan zirhona an buatsaih a, Aizawl khawpui chhung leh pawn atangin YMA chanchinbu enkawltu mi 86 an tel a, he zirhona hian rah tha tak a chhuah turah ngai ila.
Mizo tawng hman dan, a bikin ‘a ziah dan dik’ chungchangah hian tunhma atangin kan mithiam hmasate an lo inhnial tawh thin. Mizo tawng ziah dan turah ngaihdan a inang thei lova, inhnialna a chhuak a, mahni tanfung theuh dik berah an ngaih tlat avangin inhnialna tawp thei lo a awm zui a. Chutianga kum tam tak kan kal hnuah, Mizo tawng chungchanga thutawp siam thei tur, inhnialna thelhtu tur Mizo tawng chungchanga thuneitu Mizo Language Development Board chu dan ang thlapa din a lo ni ta a.
MLDB hi a dinna a la rei loh avangin tuna harsatna kan tawh mek, ‘tawng hman dan dik’ emaw ‘tawng ziah dan dik’ emaw chhawp chhuak turin hmalakna an la nei tam hman lovang tih a hriat a. Chutih rualin, ‘hei hi tawng hman dan dik a ni a, hei hi tawng ziah dan dik a ni’ tia MLDB hminga mipui hriattur pawimawh zual ‘kaihhruaina’ lehkhabu an siam thawm pawh hriat tur a la awm lo niin a lang. Hetih lai hian Mizoram Board of School Education (MBSE) lehkhabu buatsaih ‘Mizo |awng Ziah Dan’, Fourth Edition 2022, (Revised & Enlarged) tih chu 2022 kum khan tihchhuah a ni a. He lehkhabu buatsaihtute zinga a tam zawk chu tuna MLDB member hi an nih a rinawm a, MLDB hminga kaihhruaina lehkhabu tihchhuah la ni chiah lo mah se, MBSE buatsaih lehkhabu ami ang tho hi rin zui tur a nih a rinawm a. Chuvangin, Mizo tawng ziah dan chungchangah hi chuan hmalakna thar hahthlak lutuk a awm lo tura ngaih a ni.
Chutih rual chuan, Mizo tawng thumal/bungrua (vocabulary) chungchangah hian, a sengkhawm hna hi a hautak hle dawn tih a hriat a, fimkhur pawh a ngai dawn a, inrawn zau pawh a pawimawh hle ang. Hei hi chu kum hnih khata han lehlan mai theih tura thil awl-ai a nih loh hmel a. Chuvangin, MLDB huaihawta inrawnkhawmna leh zirhona symposium huaihawt chamchi a pawimawh dawn hle niin a lang.