Mizo tawnga thuneitu…

Mizo Language Development Board bul tumin nimin khan Information & Public Relations, Printing & Stationery Department chuan I&PR Auditorium-ah chanchinbumite pualin media workshop a buatsaih a. Workshop-ah hian resource person pahnihin, ‘traditional media leh new media’ tih leh, ‘Mizo tawng ziah dan dik’ tih chungchang an sawi a.
Tunhma khan chanchinbumite pual hian Mizo tawng hman dan chungchangah ‘media workshop’ tum eng emaw zat buatsaih a lo ni tawh thin a, workshop bul tumtu-ah hian sawrkar hnuaia department-te an nih loh pawhin, Mizo literature lam pawl te pawh an ni thin.
Tun tuma media workshop danglamna pakhat chu, a bultumtu hming ‘Mizo Language Development Board’ tih hmuh tur a awm ta hi a ni.
MLDB a pian hmaa Mizo tawng chungchanga hmalatu leh sulsutu ber pakhat chu MBSE hnuaia Mizo Language Committee kha a ni a. MLC hian kum 2008 khan ‘Mizo |awng Ziah Dan’ tih lehkhabu a tichhuak a; a khat mawi tawkin ennawn chhoh zel a ni a, kum 2022 khan ‘Fourth Edition’ tih chhuah a ni. He lehkhabu hi copy singhnih leh sangnga chuang zet chhut a ni tawh nghe nghe.
Mizo literature hmasawnna tur ngaihtuahtu pawl hlun tak pakhat Mizo Academy of Letters (MAL) pawhin Book of the Year a thlan dawnin MLC kaihhruaina lehkhabu hi an behchhan ber a ni a, Mizo tawng ziah dan inang leh rualkhai (uniform) zawk awmtirtu (factor) tangkai leh lian ber pakhat kan ti thei awm e; mahse, thutawp siam theitu thuneihna nei erawh a ni hran lo.
Hetih lai hian, Mizo tawng lo chik a, lo zir chiang thin mithiam tam tak an lo chhuak zel a, ‘heti zawk hian’ rawn ti thei apui an awm belh zel a. Mizo tawng ziah dan leh hman danah dik zawk inchuhin inhnialna a lo chhuak a, chanchinbu lamah te article ziakin mahni tanfung sawh ngheh tumin tan an la tlang a. Heng zawng zawnga kan buaina ber chu, ‘hei hi a dik ber chu a ni a, heti hian tihtur’ ti theitu |awng lama thuneitu bik ‘Authority’ a awm lo chu a ni.
A tawi zawngin, tunah chuan inhnialna thelh theitu, tawng chungchanga thutawp siam thei ‘Thuneitu’ (MLDB) kan nei ta hi Mizo literature khawvela bung thar kaina a ni.
MLDB hian, a bulthum (grassroot level) atanga zirlaibua seng luh tur, Mizo |awng Ziah Dan Dik hi nemnghet turin a thuneihna hi hmang thei tura hma a lak sauh sauh a pawimawh hle tih a lang a ni.