Mizo vety doctor pawlin lawm

All Mizo Veterinary Medical Students’ Association (AMVMSA) din champha 50-na, Golden Jubilee chu Inrinni khan College of Veterinary Sciences & Animal Husbandry (CVSc&A.H) Selesih-ah lawm a ni.
Jubilee hmanpuitu AH&Vety minister C Lalsawivunga chuan AH & Vety department hmasawnna tur leh zirlaite hmakhua ngaia hma lak a ni tih a sawi a. Sawrkarin vety doctor 10 leh VFA (veterinary field assistant) 9 a la dawn a, mamawh dangte pawh ngaihtuah zui zel tum a ni tih a sawi. Vawk hrileng ASF beihlet kawnga department thawktute inpekna fakawm a tih thu sawiin, state pawn leh ramdang atanga vawk, vawksa leh vawksa atanga thil siam khap mek a nih thu leh, sawrkar laipuiah hripui leng avanga harsatna thleng chhawmdawlna tur project thehluh a nih thu a sawi a ni.
Sa, artui leh bawnghnutea intodelh tura hma lak a tul thu leh nasa zawka ngaihtuahna sen tlan a tul thu sawiin, zirlaite chu ram tana hmathlir neia chumi hawi zawnga lehkha zir turin a fuih.
AMVMSA hi 1974 October 25-a din a ni a, thupui atan ‘To Empower And Encourage Fellow Veterinarians’ tih an hmang. Gen Hqrs. hi CVS&AH Assam Agricultural University, Khanapara Guwahati a ni a, a hnuaiah Sub-Hqrs. pahnih – CVS& AH Central Agriculture University, Selesih Mizoram leh CVS&AH Central Agriculture University, Jalukie Nagaland a awm mek. Hengah hian Mizo zirlai an awm vek a. Tunah hian active member 118 neiin, heng zinga 83 hi CVSc & AH Selesih zirlai an ni a; CVSc & AH Khanapara-ah zirlai 17 leh CVSc & AH Jalukie-ah zirlai 18 an awm bawk. Member ni tawhte chhiar telin AMVMSA-ah hian member 480 vel an awm tawh a ni.