Mizoram basketball sulsutu \ha eltiang Pu Tluangtea, Khatla TBL a liam ta! (1972 – 2024)

– |pa Bunghai

Mizoram basketball sulsutu tha eltiang
Pu Tluangtea, Khatla TBL a liam ta!
(1972 – 2024)

Zofate zinga thu leh hlaa thangharh hmasa zinga mi, Kaphleia kha chhuang takin Dr. C. Lalawmpuia Vanchiau chuan ‘fapa hrin man awm’ tiin a chawimawi a; mi bik, ‘fapa hrin man hla’ Mizoram basketball huangah pawh a awm ve tak e – a hming chu Khatla TBL Basketball chairman Pu R. Malsawmtluanga (Tluangtea) a ni.
Mizo thalaite hmangaiha hmangaitu khan, “|halaite kawng kan sial sak ve theihna alawm” tia Mizo nawlpui tuichilh loh, mahse, he game ngaina thalai tam tak tuihalna a pawh phak a, awmze nei zawk leh hlawkna thalaite tan ngaihtuahin, a khelh ve ngai loh basketball hi a luhchilh a, a u Marova bul lo tan tawh, TBL Basketball Club chu a u boral hnu hian a thuam changtlung zui sauh sauh a, Mizorama basketball huanga club sulhnu hnutchhiah ropui ber pahnih zingah invawrh kaiin, Khatla TBL leh Zarkawt BCA chu hei an inum zel chu a nih hi…
Kan thalaite he game bika an thlen thui takzia leh hmasawn chin ngaihtuah hian langsar lo leh lang lo lama thapui lo chhuah tang tang thin, tunhnaia min boral san ta, Khatla TBL Basketball chairman, amah Pu Tluangtea kha, ‘fapa hrin man hla’ tih hi a inthlahrunawm loh thlawt e.
Infiamna ngaina tak Kaphleia’n, “kan dam rei leh rei lohte hi kum te, thla te hian a hril lo ve, kan thu leh thiltihin a hril ber zawk’ a tih kha he khawvela kum 52 chiah min champuitu, Pu Tluangtea chhungril nun khalhtu a nihzia amah khan tlangaupui chiam lo mah se a thil tihin a tarlang thung.
A tawng ri aiin a thiltih leh inpekna zozaite avangin hriat zui reng tur zinga mi hei a ni – hmachhawp a la neih tam teh reng nen, a liam hma lua deuh a ni!
Heti taka Mizoram basketball a ‘thanduan’ theihna kawngah hian TBL chhungkua hi inhnamhnawih ta lo se, a than a khingbaiin vawiina state pawn thlenga Mizoramin chawimawina kan dawn zozaite hi kan hlawhchhuak zo kher lo ang!
Chu mai a ni hlei nem, hun liam deuh taa TBL Football Club-in hlawhtlinna a petchhuahte kha an thahnem hle.
Kum 1995 – 1998 chhung khan National 2nd. Division League-ah champion niin, Eastern Zone qualify tournament, Guwahati-ah Mizoram F/C atangin TBL FC khan an khel hmasa ber – tualchhunga ‘95-’96 season-a tournament pakua an telna atanga pasarih ngawta an champion thawtte kha a pui miah miah thlawt!
Football lam hi a hranpaa phek tam daih sulhnu sawi tur a awm a, TBL chhungkua leh infiamna hi chu nghet taka inthlunzawm a nihzia chu – TBL tih rualin, JCB, basketball leh rawng eng (yellow) hi tun thlengin mitthla ah a rawn lang rual nghal thawt zel a nih hi!
MBBA lamin MSL (Mizoram Super League) a duangchhuak a, hlut a hlawhin entu an pung tual tual a, association ngaihtuahna leh thlantui phenah hian MSL club-te’n sum an sen a sang hle.
Kan tualchhung thalaite’n hmasawn belh an mamawh a, khelhpui tur player quality an neih that poh leh hmasawnna a thang chak a ni mai. Hnam dang player tha man to tak taka chahluh a ngai zui zat, club lam tan foreign player lian leh hrawl, thiamna leh theihna thuk tak neite bakah Indian basketball player tha bikte’n Mizoram an rawn dai lut chho zel a, vantlangin kan hriatpui loh piah lamah hian Khatla TBL Basketball Club hian mi dum (black) player pakhat ringawt tan MSL chhung, thla hnih vel lekah India tangka, cheng nuai 3 chuang hlawh (salary)-te pek a ngai a, an thlenna homestay/hotel man, ei leh in bakah an thlawhna chuan man zawng zawngte nen chuan sum chhuak hi turu hem hem tak a ni – Khatla TBL puipa lam hian hlep leh hloh hi hrilhfiahna bu hran an nei a ni ngat mai.
MSL Season 9 lai neih a ni tawh a, season khat chhungin TBL Club enkawlna’n cheng nuai 23 chuangte hi player hlawh ringawtahte a luangchhuak nia – a rah erawh a thlum a, North East India Mens Basketball inelnaah ngat phei chuan Mizoram hi elphak rual lohin kan champion nawn ta awn awn reng a nih hi!
Mizo tlangval, TBL captain |hazuala leh Lalrina Renthleite bakah player tam tak state danga hnamdangte’n an hmingin an ko lauh lauh thei ta – TBL Club ang tho a, club dang enkawltu leh neitute hi fak loh chi rual an ni lo!
Hetianga hnam dangte’n Mizo min hmelhriat theihna tura football a ni emaw basketball leh inelna hrang hranga club neitute senso tam leh nasatzia hi a nawlpuiin kan rin phak bak piahlam daih a ni – hnam tan an ngaihtuahna mai ni lovin, an neih an thehchhuah zar kan zo tlang a ni e.
Fam Pu Tluangtea leh a u Marovate rau chan ang hi pa thluak hausa lo tan chuan cho rual a ni lo.
|henkhat hi chu kan ruangin thlanmual a thlen ruala theihnghilh zui tur kan ni, duham leh hmasial taka kan dam laia mahni tan chauha kan khawsak avangin hnutchhiah kan nei lo va, luangchhuak nun kan nei tlat lo a ni!
Chutiang kara biru tak leh fakna beisei hauh lo va Mizo thalaite tana luangchhuak ral raih, a hnampuite tana a hmathlir thui tak nei, tha leh thiltih hmanga tarlang thintu, Khatla TBL inkhel tawh phawt chu khawsik hlarh hlarh chung pawha a hmun ngeia tawiawm thin, Khatla TBL Basketball Club chairman Pu Tluangtea kha kan zingah a lei taksa awm tawh lo mah se he hnam hi a ral raih hma chu theihnghilh a ni tawh ngai lovang – a thil tih leh a luanchhuahna rah khan ‘fapa hrin man hla’ nih a hlawhchhuah tir miau a…
Mizoram sports minister Pu Lalnghinglova Hmar (Tetea Hmar) chuan, “Pu Tluangtea hi Mizoram infiamna khawvela mi pawimawh tak a ni. Football buaipuiin an chhungkuain sum tam tak an seng a, chumi hnuah basketball lamah Zoram khawvel nghawng khawpin tan an la leh a, hetiang mi hi Mizoram hian a ngah lo, midangte tana insen inhuam kan chan hi a uiawm takzet a ni” tiin sunna leh uina thu a sawi.
Mizoram Basketball Association (MBBA) secretary Pu Zomuanpuia paw’n, “Mizorama basketball club kal-phung nghet tichhuak hmasatu, ui nei lo, mi thilphal leh nelawm, mi tin mila insiamrem thiam. Mizoram basketball-in tun dinhmun a thlen theihna’na mi pawimawh tak a ni. Pu Tluangtea contribution hi sawi sen a ni lovang. MBBA tan leh Mizoram basketball tan chuan channa nasa tak a ni,” tiin he fapa hrin manhla hi a thlah bawk.
Talent nei tha leh hriat hlawh, International Heyball Open – 2024 khela thang mek, TBL player hlui Lalrina Renthlei chuan Thailand atangin heti hian a pu hlui hi a rawn thlah: “Mizoram basketball-in tun dinhmun kan thlen theihna pawimawh em em chu club owner-te inpekna a ni tih kan hre vek awm e. Tuna club upa ber pawl TBL neitu Pu Tluangtea kan chan hi a pawi hle!
“Basketball a tui a, thalai tam tak promote-tu a ni. A club-ah hian ka lo khel ve reng tawh thin a; mi kawm nuam em em mai, eng rual pawh kawm thiam vek mi a ni. TBL chhungkuate ka tawrhpui takzet e,” tiin.