Mizoram budget 2025-26 chu…

Budget session chu nimin khan zawhfel a ni ta a. Kum 2025-26 chhunga Mizoram Budget Estimate chu cheng vaibelchhia 15,198.76 niin heta tanga estimated expenditure cheng vaibelchhia 1363.34 chu House-a pass ngai lo Charged Expenditure a ni a; a bak cheng vaibelchhia 13,835.42 chu House-in a pass ta a ni.
Finance changtu chief minister Lalduhoma’n budget a pharh nia a lo sawi tawh angin, kum 2025-26 chhunga sum hman tur atanga 82.51% hi Revenue Expenditure tur a ni a. Revenue expenditure a sanna chhan thenkhat tarlan zingah, annual increment leh dearness allowance pung avanga sawrkar hnathawk hlawh lo pung leh Pension payment lo tam chho zel te chu a tel a nih kha.
Capital Expenditure (hmasawnna hna thawhna tur) atan Cheng Vbch 2,658.56 dah a ni a, hei hi budget estimate atanga 17.49% a ni. Hmasawnna hna han tih hian, sawrkar leiba tihhniamna tur (cheng Vbch 419) a tel bawk.
Heti hian, kum 2025-26 chhunga Mizoram budget estimate cheng Vbch 15,198.76 atanga cheng Vbch 12,540.2 chu sawrkar hnathawk hlawh leh a behbawmah hman tur a ni a. A bak zawng cheng Vbch 2658.56 chu ba rulhna tur leh hmasawnna hna thawh nan serh hran a ni ve ta a ni.
A tawi zawngin, sawrkar hnathawk hlawh leh a behbawmah 82.51% hman a ni ang a, hmasawnna hna thawh nan leh leiba rulh nan 17.49% hman a ni ve thung ang.
Heti zawng hian a sawi theih bawk: Sawrkar hnathawk mi singnga vel tan 82.51% hman a ni ang a; leiba rulh nan leh mipui nuai 13 chuang tan 17.49% hman a ni ang.
Mizoram rorelna in sang berah mipui aiawh ten thla khat chhung zet ro an rel a, chu chu mipuiin langtlang takin kan lo thlir a. House chhung boruak awm dan kan hmuin kan hre vek a, ngaihdan pawh kan siam vek tawh ang.
Budget session boruak khaikhawm nan chuan, ‘a chang chuan an nawi ve thelh thelh thin’ a tih theih awm e. Bible chhung thu a lar hle a, session tawp dawn lamah UCC lem leh Phuldungsei lam ration card avangin rorel boruak a sosang deuh.
Eng pawh ni se, budget session zawhfel a ni a, heta tanga lang chiang ta chu, hmasawnna hna thawhna tur sum eng tham mah kan nei lo; central scheme kan hman tangkai thiam a pawimawh dawn hle, tiin a khaikhawm theih mai awm e.