Mizoram dawn tur pek thuai tum

Sawrkar laipui dawra New Delhi-a kal Rural Development minister Lalruatkima chuan Ministry of Rural Development secretary Shailesh Kumar Singh hmuin mamawh a sawipui a. An ministry hnuaia Mizoramin a dawn theihte pek thuai an tum tih a lo hrilh.
Union RD secretary chuan ni 100 inhlawhna, MGNREGA chu sawrkar kum kal mekah Mizoram tan an sanction tur thu a lo hrilh a. Ni 100 inhlawhna kalpui kawngah Mizoramin hna a thawh that avangin, duhsak bik a inthlahrunawm loh thu leh state dangte pawhin Mizoram chu hemi kawngah hian entawn se a duh tih a lo hrilh. RD secretary hian RD hnuaia Cluster Facilitation Project kaltlanga ministry-in Mizoram tana sum a la pek lohte pawh karleh lamah rawn pek hman an tum thu a lo hrilh bawk.
Rural Livelihood Mission hnuaia scheme pakhat ‘Ajeevika Grameen Express Yojana’ (AGEY), thingtlang lama self help group ten eizawnna atana an hman tur lirthei pek thin pawh Mizoram tan an pekchhuah thuai tur thu minister hi a hrilh a. Hemi atan hian ministry-a a khawihtute chu sanction buaipui nghal turin Union secretary hian a hrilh a ni.
Union Rural Development secretary hian inthlan hma ngeia Mizoram rawn tlawh a tum thu a sawi bawk.