Mizoram HIV+ve chhiarkawp…

Nimina health minister hova Mizoram Legislative Forum on AIDS thutkhawmnaah, HIV/AIDS chungchanga Mizoram dinhmun thar ber tarlan a ni a. India rama HIV hluar dan (prevalence rate) 0.2% a nih laiin Mizoram chu 2.73% a ni. Chumi awmzia chu, national level aiin a let 13-in Mizoram a sang zawk tihna a ni.
Tun dinhmunah Mizoram hi HIV prevalence rate-ah India rama a sang ber a ni mek a. Pahnihna Nagaland (1.36%) let hniha sang kan ni a, a pathumna Manipur(1.06%) let 2.5-a sang kan ni bawk. Prevalence rate san zualna state dang pathum heng Andhra Pradesh (0.67%) te, Telengana (0.47%) leh Karnataka (0.46) te nen hian kan inthlau veng veng hle a ni.
Report-a a lan dan chuan, January 2025 thleng khan Mizoramah HIV+ve kai mi 32,287 hmuhchhuah an ni tawh a. He natna avanga thi hi hriat theih chinah 5,511 an tling tawh bawk.
Nikum 2024 April leh kumin 2025 January chhunga HIV+ve hmuhchhuah zat chu 1,769 a ni a, chumi awmzia chu chawhrualin thla tin HIV+ve 177 hmuhchhuah a ni a, ni tin mi 6 zelin HIV+ve an kai tihna a ni.
Report atanga lo lang ta chu, he thla 10 chhunga HIV+ve kai thar hmuhchhuah atanga za zela 67 te chu invenna tel lova sex hmang an ni a; hriau thlianghlim lo inhmantawm atanga kai hi 30.44% an ni bawk.
HIV/AIDS that loh dan leh hlauhawm dan, a inven dan hi a tua te pawhin kan hrechiang thawkhat viau tawh a, chuti chung chuan invenna tel lova sex hmang an la tam hle a, hei hi a chhan pui ber niawma ngaih theih chu ‘ruihhlo’ bawk hi a nih a rinawm.
Eng pawh ni se, Mizoram Legislative Forum on AIDS hian HIV/AIDS chungchanga Mizoram dinhmun hi tih takzeta an vei ve a hun ta hle. HIV hrik kai ten chatlak lova ART damdawi an lak theih nan, MLA ten an Fund atangin Rs. 50,000 theuh, senso atan MSACS hnena hlan an remti tih thu han hriat te hi a lawmawm hle a. Chutih rualin, MLA Fund thahnem zawk hi HIV/AIDS dona lamah hian pawh then theih ni se, chu chu kan tun dinhmun hian a phut deuh tlat tawh niin a lang.