Mizoram Legislative Forum on HIV/AIDS thutkhawm hmasa ber nimina neihah HIV positive, ART damdawi ei lai ei chhunzawm lo, anmahni awmna chhui zui hleih theih loh an awm thin thu tarlan a ni a; Aadhar nena thlunzawm dan ngaihtuah nise tih an rel nghal a. National AIDS Control Organisation rawn chungin mi zawng zawng tan HIV test theihna tur MSACS hotute’n kawng lo dap se tih te, he natna hi kan ram leh hnam hnuk khawih thei thil a nih avangin nu naupai laiin HIV test an tih ngei ngei a ngai ang hian, Mandatory Test tih theih dan Policy duan emaw siam that emaw nise tih te an rel bawk a ni.
MLF on HIV/AIDS meeting thurel hian HIV/AIDS dona kawngah bung thar min kaitir dawn ta niin a lang a, hei hi kan state mamawh tak pawh a ni awm e.
HIV/AIDS do kawngah hian Mizoram hian thawm chu kan chhuah nasa thin hle a, kan thawm pawh a ring a, mahse kawngro a su tak tak chuang lo; chu chu thudik tak a ni a, a dikzia pawh HIV Prevalence 2.73% (national average let sawm chuang) nei mek kan nihna hian a pholang chiang tawk viau a ni.
Hun kal tawh chu kal tawh ni se, kiam lam pan thei lo, zual zel zawk HIV/AIDS hi Mizoram hian tha pui nena beihpui thlaka kan do hi a tul takzet tawh a, mutmawh hnarmawha neih tak tak a tul tih a lang reng tawh a ni.
Tuna MLF on HIV/AIDS meetinga sawi rik ang hian, khauh deuh zawka kan innuai chhoh tan chu a ngai tawh tih a lang reng mai a. ART damdawi ei chhunzawm duh lo, bibo leh ta mai mai zingah hian midang kai darh pawisa mang lo hi an kat nuk lovang tih sawi theih a ni lo a, chuvangin tlema a hma aia khawng deuh zawka kal dan tur ngaihtuah te pawh a tul zel dawn ta niin a lang a. Chuti a nih loh a, right… right kan tih chhung hian kan inkai darh pherh zau zel ang a, ILP-a inhung hram hram hnam tlemte hi chan loh khan lamah kan tawlh liam duak duak mai ang tih pawh a hlauhawm hlel lo a ni.
Mizoram Legislative Forum on HIV/AIDS
Get real time updates directly on you device, subscribe now.
Next Post