Mizoram Mau vs Ethanol

Chief minister-in Sairang Horticulture Centre-a nimina Mau hmanga meihawl siamna a hawnnaah khan thu a sawi a. “Meihawl kan siamna hnar ber hi thing a ni thin a, thing puitlin hun chhung a rei a, Mau chu kum hnih khat lekah a lian leh mai a; meihawl siam nana mau kan hman hian, kan ramngaw chereu chak lutuk tur kan veng a ni,” tiin.
Ni e, Meihawl kan la hman miau chuan, thing chereu chak tur dan nana Mau hmanga meihawl siam chu a finthlak viau angin a ngaih theih awm e.
India hmarchhak hi India rama mau tamna a ni a, Mauin ram a khuh % sang ber chu Arunachal (28.72%) niin, Manipur (16.62%) chu pahnihna a ni a, pathumna Mizoram chu 16.51% a ni. A bak Assam, Nagaland, Meghalaya, Tripura leh Sikkim te chu 12% hnuai lam vek an ni. Chutih laiin, Mau hman tangkaina kawngah Mizoram hi state dang mau nei tlem zawkte aiin kan hniam viau mai.
Mau ngah state kan nihna hi kan ram hruaitute chuan chhuang takin tunhma atangin an lo sawi tawh thin a, mahse han thatpui ve lawih thamin Mau hi kan la chhawr tangkai tak tak thei lo. Meihawl siamna atana kan han hmang tur hi ropui kan tiin kan lawm tawk viau niin a lang.
Kan hriat angin India chuan kum 20 vel kalta atang khan Ethanol Blended Petrol (EBP) Programme a lo kalpui tawh a. He EBP Programme hnuaiah hian petrol-a biofuel an pawlh thin Ethanol hi Mau atanga lak chhuah theih a ni. India-in petrol-a Ethanol 10% a pawlh khan, ram dang atanga petrol lakluh nana sum a sen thahnem tak a hum (save) thei a. Tunah hian 20% (ethanol blending in petrol = E20) a kalpui leh mek a. Petrol pawlh atana Ethanol hman hi Mau atanga lak chhuah theih a nih avangin hei hi kan state chhunga Mau, tihngaihna kan hriat vak loh hi, sum tam takah kan chantir theiin, mi tam tak eizawnna siam theihna a ni.
Mau atanga meihawl siam chhuah hi kan sawisel hran lo; mahse, Mau atanga meihawl siam aia kan hlawkpui theih zawk tur chu, Ethanol Blended Petrol (EBP) Programme hnuaia thuk zawka kan intah luh ve hi a nih a rinawm. Hei hi kan hlawkpui tur buaipui tham a ni.