Mizoram Open Taekwondo Championship-ah Aizawl Taekwondo Academy an champion

SAI, State Training Centre, Mission Vengthlanga ni thum awh 18th Mizoram Open Taekwondo Championship chu nimin, April ni 4, 2024, Ningani khan John Tanpuia, Secretary Mizoram State Sports Council chuan a khar a, a pumpuia point hmu sang ber Aizawl Taekwondo Academy, Electric Veng chu an champion.
Champion team Aizawl Taekwondo Academy hian point 4770 an hmu a, anmahni hnaih bertu Exodus School Taekwondo club-in point 2180 hmuin, runners up team hian nomawi an chawi.
Point 1720 hmutu Taekwondo Academy of Best Friend chuan Best Fighting Spirit Team trophy an dawng.
Point 1550 hmuin Kolasib Distric Amateur Taekwondo Association chuan Most Promising Team trophy an hawn ve thung a; Armed Veng South Taekwondo Club chuan point 1320 hmuin Best Discipline Team trophy an dawng bawk.
Mimal lawmman ngaihhlut Best Fighter atan Amosa Lalnunhlua, SAI Aizawl leh Esther Lalchhanchhuaha, Kolasib DATA-te thlan an ni.
Best Poomsae Perfomer atan Daniel Lalhumthanga, Gidae Taekwondo Club leh Vanlalhmangaihzuali, Kolasib DATA-te thlan niin, Best Referee-ah KC Lalrindiki, Ramthar thlan a ni a, Best Coach-ah Lalremruata, Khawzawl thlan a ni bawk
Championship kharna inkhawm hi Master V.L. Sawma, Senior Vice President, MATA-in a kaihruai a, championship report chu Master Joseph Thansanga’n pein, MATA President Prof. Rualkhuma Colney-in thu a sawi bakah CH Vanhmingthanga, Vice President MATA-in lawmthu sawiin championship a khar.