MIZORAM POLITICAL ECONOMIC

BY Laldawngliana,Kolasib

Pu C. Chawngkunga Ex. Minister & Co-Convener INTACH, Mizoram Chapter-in ”British sawrkarin Feb 26, 1890-a mi rawn hneh hnu khan mi awp zui ta a. Min rawn awp hma khan Chhim leh Hmar,Chhak leh Thlang kan indo a, Sailo Lal leh Sailo Lal an indo a, a huai huai lalna ram ni thin kha inawpna fel tak hmangin Duhlian ram ni thin kha Lushai Hills tiin an rawn thlak a.Tichuan British-in 1890 atanga 1947 chhung min awp chhung khan inrun, inrawk, inram, inrawt kha an khap ta a, Mizoram chu Kristian ramah kan lo chang ta a,” tiin a ziak a…
A ziah zelnaah April 1947-ah Constitution Adviser Sir B.N Rao leh Assam Provincial Minister J.M Nichols Roy leh Constituent Assembly Secretary, Rama Dhiany Aizawlah an lo kal a, Mizo Union Councillor ten Mizoram India awmdan tur Memorandum an lo thehlut a, chutih laia Mizo Union hotu Pu Lalbuaia sawi dan chuan Sir B.N Rao hian Assam Provincial Administration hnuaia awmte hi India ram a ni nghal ang a, Raja leh Maharaja rama awm te hi Adviser te kal tlangin Constituent Assembly hnenah an thehlut ang. North West Provincial Administration te erawh hi chu anmahniin duhthlanna an nei thei ang. Nangni Excluded Area, Partially Excluded Area ten in duhthlan theih dan chu Memorandum siamin in thehlut ang. Amaherawh chu, Bordoloi Committee hnuaia awm in ni a, kan hnenah pawh in thehlut thei, Bordoloi Committee kaltlangin kan hnen alo la thleng ang. In hriat reng tur chu India mipuite an hlimin an lawm em em a, chutih rual chuan nangniho hian India Independent hi eng angin nge in nghah ve. Tuna in Memorandum kan han en hian ‘Autonomy’ in duh a, chubakah hnam dangte chimral in hlau hle mai a, India danpui siamtute thurawn petu ka ni a, ka zin tawhna reng rengah chimral hlauhawm leh autonomy thu hi an sawi ngai lo. Chimral in hlauh hle chuan in ral lovang. ‘Autonomy’ han tih hian in duh nia lang chu America Red Indian inhumhalhna ang neih in duh niin a lang a, Scottish Highlander hote pawhin Scotts mi plain-a awmte ang lova inhumhalh an duh hi a ang khawp mai. Engpawhnise, India danpui hi hnam tin chi tin, Sakhaw tinte zalenna huangzaupui anga siam kan tum ang a, in duh ang pawh hi a leng thoin ka ring. Thuneihna tawp nei ka ni lova, Constituent Assembly member tam tak awmte hnenah thurawn ka lo pe ang a, in duh ang ngeiin Constitution hi a rawn chhuah ngei ring ula, thlamuang takin lo awm rawh u’,’ a ti a ni, tiin. He thu ziak atang hian ngun takin Mizo Hnam hi inngaihtuah ila eng dinhmunah nge kan la awm zel ang tih hi a ni.
22nd January, 1994-a Ministers for Economic Development, North Eastern Region Shillong-a neih-a khatih laia Mizoram Chief Minister Pu Lalthanhawla thusawi zinga pakhat hi a ngai ang ang hian kan tarlang teh ang. ”..Most of the rivers in the hill States of the North East Region have very high potential for generation of power. Moreover, these rivers caused havoc to the plain areas of Assam every rainy season. Therefore, controlling these rivers in the hill states of the North Eastern Region will not only generate power for development of the region in particular and the country as a whole, but it will save the State of Assam from the yearly havoc of flood causing untold misery to the people and incalculable loss of material. There are important projects for control of these revers and for generation of power. These important projects are Tipaimukh Dam Project, Tuirial Hydel Project, Tuivai Hydel Project and Bairabi Hydel project. In all these cases, the project reports have been prepared and submitted to the Govt.of India. I would, therefore, like to draw the attention of the Hon’ble Chairman and this august body to speed up the necessary clearance for taking up these projects”.
Mizoram hi Power-ah kan la intodelh lo hle mai intodelh hun a nghahhlelhawm hle thin mai. Sorkar hmalak dan pawh hriatthiam a har a ni. “98 inthlan khan Congress sorkar tla lo se Power megawatt 270 kan nei tawh ang, Mizoramin tun dinhmuna Power mamawh 100 Mw vel bakah hralh tur 170 Mw a neih tur thu Mizoram Chief Minister Pu Lal thanhawla’n a sawi a. Congress term liam ta ah hydel power project siam hna thawh mek panga – Tlawva HEP, Kawlbem HEP, Tuiching MHP leh Tuirial HEP te an ni a, hei hi peih hman a ni a, hetih hun lai hian 210 Mw pe chhuak thei tur Tuivai HEP -a inremna chu siam that tum a nih thu leh Kolodyne HEP 460 Mw pe chhuak thei tan MoU ziah a nih tawh thu sorkar hotute atangin kan hre bawk a, tin, Chhimtuipui HEP 635 Mw, Lungreng HEP 815 Mw leh, agreement ziah fel tawh zingah Bairabi HEP 80Mw pawh telh a ni a. Mat HEP 60 Mw pe chhuak thei tur Central sector hnuaia agreement sign-in thawh mek a nih thu an sawi bawk a. P&E hotute atanga thu lo langah chuan mamawh san lai berin 155 Mw tun dinhmunah Mizoram mamawh a ni. Kum 2019 khan Tuirini 24 Mw pe chhuak thei tur khuah tumin hma an lak thu kan hre bawk a, kum bulah Power siam chhuak belh turin Tuivawl leh Tuirini 42 Mw ah Mizoram sorkar a insawrbing thu kan hre leh a. Khawiva 1.05Mw, Tuirivang 0.30 Mw, Teirei 3.00 Mw, Tuipui 0.50Mw, Kau-Tlabung 3.00 Mw, Maicham -II 3.00 Mw, Serlui B 12.00 Mw, Serlui A 1.00 Mw, Tuipanglui 3.00, Maicham -I 2.00 Mw., Lamsial 0.50, Tuiching 0.10, Tuiriza 0.10, Tlawva 5.00Mw te hi Sorkar enkawl Hydel project 14 kan neihte an ni a, Power an pek chhuah theih zat chu 34.55 Mw chauh a ni. Tun MNF sorkar hian 2030-ah Power-a Mizoram intodelh tir an tum a ni a, Investor zawng buai lovin sum tam tak an sen ralna PAHOSS, Mau/raw tiak chi supply, Phul lem phah etc nana an sum sen zo zai hmang hian hydel project pahnih te hi chu an zo thei mai lo ang maw ka ti a ni. Tin, Power-a kan intodelh theihna a nih dawn phawt chuan hydel project atan sum a ngaih tam dawn avangin sum kan sen teuh teuhna ang chite hi chu ti hrih lo mai ila a tha ngawt ang. Mizoram hian Governor (Dr. Hari Babu Kambhampati ) min duhsaktu kan nei thei reng mai te hi thil lawmawm tak a ni. Tun hnaiah Kan Governor hian Raj Bhavan -ah P&E leh Ministry of Jal Shakti hnuaia Central Water Commission (CWC) hotute a kawm tumin a rang lama Mizoram lui atanga Power siam chhuah theih zat dik tak zir chian dan tur a lo sawipui a. Power siam chhuah chungchangah Prime Minister a hmuh tawh thu leh Prime Minister chuan Mizoram P&E dept -in PMO office -ah presentation an pek a rem tih thu leh hemi hma hian Power Mizoramin kan siam chhuah theih zat chiang zawka zir chian a ngaih thu a lo hrilh a. ZPM-in an Policy an tlangzarh khan – Tlawng, Mat-sekawi 76 Mw leh Tuivai 210 Mw ah hmalak an tum tih kan han hre ve leh a. MPCC lam hian eng ruahmanna nge an neih dawn kan la hre lo a. Power-ah hian duh khawp hi chu nei ila economic independent te pawh kan hnaih awm a sin. Nikum lam khan sorkar hotute’n Mizoramin tui chakna atanga Power kan siamchhuah theih zat chu 4,000Mw a nih thu an sawi a, nikhata kan siam chhuah theih zat chu 5-10 Mw ni in, 144 Mw hi ni khata kan mamawh ah an chhut a, a bak zawng chu pawn lam atanga kan lei a ni.
Ni 30.1.2009-ah NLUP atana official Level meeting hmasa ber chu Mr.B.K. Chaturvedy, Member (NE) Planning Commission hovin neih a ni a, kan Chief Secretary Pu Vanhela Pachuau leh Official dangte Mizoram aiawhin an tel a. Hmanhmawh taka NLUP kalpui duhna avangin Feb 19,2009-ah NLUP project ruahmanna hmanhmawh taka siam, Rs 364.00 Crore dilna nen Planning Commission-ah theh luh a ni. Planning Commission-in project Report siam tha tura a duhna angin April 2009-ah Mizoram sorkar chuan NLUP project kimchang siam turin mi pathum viz Pu.P.L.Thanga, Member & Secretary of SPB,Pu L.R. Laskar, OSD, NLUP leh Pu Lalzarliana, Jt.Dir.Agri. te a ruat a. NLUP ruangam leh tum dante chu May 28, 2009-ah Planning Commission-ah sawiho a ni a. Kan Chief Minister-in Corruption dona a ngaih pawimawh avangin, Mizorama development programme kalpui mek chi hrang hrang inbukthuah tam tak a awm avanga thil fel lo chi hrang hrang awm theite sawiho a ni. Uluk taka sawihona neih hnu chuan NLUP hnuaia trade hrang hrangte kalpui tura rawtte chu Central Scheme hrang hrang viz CSS/ACA/SPA & NLCPR, NEC etc te nen inbukthuah tam tak a awm avangin, a theih chen chenah NLUP leh CSS/ACA /SPA etc te kaikawpin ‘Convergence’ hmanga kalpui nise tiin Planning Commission chuan thutlukna a siam ta a.
He thutlukna dung zui hian Planning Commission chuan NLUP project, ruahman lailawkna chu siam tha turin a ti a; he thutlukna dungzui hian NLUP project chu ruahman that leh niin Rs 2907.98 Crore chu ni 19.6.2009 -ah Planning Commission-ah theh luh a ni leh ta a. Beneficiary contribution tel lova central sawrkar atanga dil zat Rs. 2526.98 crores a ni. Ni 3.8.2009-ah Dy.Chairman, Planning Commission leh Hon’ble Chief Minister, Mizoram ten kum 2009 – 10 Annual plan an final ni in 2009 – 10-a NLUP-a hman turin Rs 100.00 Crore Planning Commission-in min pe a. Ruahmanna changtlung zawk duhna avangin Rs 100 Crore chu NLUP atana hmang lovin State mamawhna dang atan hman a ni ta zawk a. NLUP beneficiary ni lovah vbc 100 chuang hman a nih thu hi chanchinbuah te pawh ziah lan a ni.
NLUP project chu ni 22.9.2009 -ah Prime Minister Office ah sawiho a ni a.He meeting -ah hian Mizoram State aiawha kalte bakah Planning Commission-a Member Secretary leh Finance Ministry-a Secretary te an tel a. Hetah hian NLUP kalphung turte, a tum leh kalpui dan tur chungchang thu te, Scheme dang nena inbukthuah siamrem dan tur te, a bika central sorkar pawisa min pek dan tur te, Prime Minister Special Package emaw ni si a State Plan sum pawn atanga pek theih a nih leh nih loh thu te sawiho a ni a.
Principal Secretary to Prime Minister hova thutkhawmnaah chuan NLUP project chu Central sorkar-a hnamhnawih tur Ministry hrang hranga Secretary te nena uluk taka sawiho turin Cabinet Secretary Chairmanna hnuaiah Committee of Secretaries (CoS), Govt.of India siam ni se. NLUP kalpui dan tur chipchiar zawk buatsaih dan tur leh Mizoram dinhmun zir chiang turin High Level Inter- Ministerial Official Team ten Mizoram tlawh bawk se. Ni 6.5.2010 -a NLUP ngaihtuah tura Committee of Secretary thut khawm vawi 2 -naah Cabinet Secretary chuan Secretary thenkhat ten beneficiary tana cheng nuai 1 tam lutuk tia an sawiselna a chhannaah chuan NLUP project hi mirethei chhanchhuahna atana Model project tha tak state dangte tan pawha entawntlak tur a ni dawn tiin Mizoram sorkar rawtna a fak hle a .Chuti chungin he Project tha tak hi Assembly Session-a tlangzarh CAG audit report ah khan NLUP a thil fel lo tarlan a ni ta a, he project tha tak hlawhchham chhan hi thuneitute lam a ni. Mizoramin kan kalsan a ngai hrih ta a ni. NLUP thil tum tha tak leh chung zinga Comprehensive Land Reform bawhzui a nih dan pawh kan hre tawh lo. Congress sorkar in Project tha tak NLUP a kal pui danah khan thil fel lo tam tak a awm kha a pawi ka ti tak zet a, la thar thawh leh zawk atan pawh tha hlein ka hria a ni. Eizawnna ngial nghet siam sak a, Industry tenau din leh chumi kaltlanga zokhua leh khawpuia cheng mi harsa zawkte tana sum lak luh tihsan te kha a thil tum pawimawh tak a ni a. NLUP hnuai Mechanisation of Agriculture hnuaiah Power tiller leh khawl chi hrang hrang mamawh te subsidy-a pek chhuah te kha amamawhtute tan chuan vawiin ni thleng hian hlu tak a va ni em. SEDP kalphung hian NLUP nihphung kha khan lo tak ni mah se ‘Policies & Programme’ tha tak tak a inkhung a, amaherawh chu, Mizote hian tih tak takna hi kan tlachham a ni tih hi hai rual a ni lo.
2018 kum bulah kan Chief Minister hian kan thawk hraw dawn kan ngaihtuah hraw bawk ang lo ti diam a, ”Mizo Nationalism humhalh a nih theih nan economic kulhpui kan siam a ngai a, economics-a kan intodelh chuan society nationalism te, religious nationalism thlengin humhalh a ni thei nghal dawn a ni,” a ti a; Mizoram ei leh bara intodelh turin formula pathum-Privatisation, Mechanisation leh Large scale production-te an hmang dawn a ni tiin asawi bawk a. 2017- kum bulah kan sokar hunah Admn & Dev.danglam tak a thleng ang a lo ti bawk a. Vau Thlaah tho hian ”SEDP hnuaiah sing bi den dena sum sem a ni dawn lo tih sawiin,”Chhung tinte’n bul tan tirh atanga eizawnna nghet an neih thleng chhawmdawlna leh tanpuina pek an ni dawn. Chhung tinte’n eizawnna nghet an neih theihna tur chuan a tlem berah cheng nuai thum tal an mamawh tih kan hria,” tiin a sawi leh a. Kum 2019 – June thlaah ”Ram hmasawnna chu co-operative system-in an kalpui dawn tih sawi ve leh in, “Kan economic system hi land base a tam ber a, land base economy hi co-operative system tel loin a kal tak tak thei lo. Chuvangin co -operative system hi kan hmang tangkai dawn a, hmasawn zawngin kan kal dawn a ni”. ”Kut hnathawh chu sorkar hnathawh ai mahin a hlawk zawk dawn” thu a sawi chho leh a. Kum 2023 bulah kan sorkar hi Corruption leh thil dangah mualphona lian kan nei lo ti mahse nikum lam Presbytery inkhawmpuiah eirukna nasa zawka do rawtna pawm a ni te, Mizoramah eirukna a reh theih nan YMA-in chak zawka hmalak an rel te hi thil vanduaithlak tak a ni. ”Ka CM leh chuan a let tam takin ka thiam tawh ang” a tih nen chuan inang lo tak a ni. Mizoramah hian leileta siam theih ram hectare 70,000 chuang a awm a, khawl hmangin leileta siam a nih chuan chawa Mizoram intodelhna khawp a thar theih dawn thu a sawi te kha bengah a la reh hman lo. Inthlan hma leh hnua an thu sawi tam takah hian an ke hi an la pen lut lo a ni. Mizoram mipuite hian sorkarna hi pe nawn leh pawh ni ila eng hi an ang dawn chuang lo a ni. Mizoram hi Corruption avang te, dan pawisa lova ro kan rel thin avang te, hleih nei lutuka thil tih kan hreh lo lutukna avangte hian eng chen nge maw kan la tawrh zel dawn le!
Sorkar hnathawkte hi hmathlir tha tak neia ram tana hna thawk tur an ni. Union Minister Pi Meenakashi Lekhi in Mamit District a tlawh tumin ‘Sorkar hnathawkte rilru put hmang chu mipui ‘Hmasawnna’ a ni tur a ni’ a rawn ti a. Sorkar hnathawkte hi sorkar khalh ngil tur khawpa sorkar tana an rinawm hi mipuiin kan mamawh a ni. An corrupt tlat chuan mipui tan sorkar tha neih a har em em a ni. Kan mithiam ten inrenchem a, a tul tawpah lo chuan hmasawnna hna thawh rih loh an duh chang pawh kan hre tawh; hei hi a chhan chu Govt. of India-in sum enkawl dan a thlak danglam hi MNF sorkar hian Congress term liam ta ai khan an zei lo zawk tih tunhnaiah mite sawi ka dawng hlauh mai. SEDP-a sum hman dan aiin NEDP-a sum chet vel tir dan pawh tha zawk niin an sawi. ‘New Economic Development an duan tharte hi inbumna a ni’ tiin kum 2016 khan Hnam Run lamin an lo sawifel leh vek tawh a, kawmchhakte hi zawng an thusawiah an thu a langchiang a ni .. India ram State dang te hian Niti Aayog hi an thatpui viau bawk. Planning Commission- a let hun pawh hi la awm thei a ni. Mizoram sorkar hnuaia hnathawkte hian a rualin hlawh hi an la thei, tun hma zawng pawhin an la, puh tur dang ka hre lo, Corruption vang chauh a ni. A ruala hlawh pek an ni lo hian sum leng vak a ti hniam nasa a, hei hian mipui tan eizawnnaah harsatna a siam nasa em em a ni.
Thlazing thla August 2023 kan thleng a, hun pawh a lo inher ve leh hret ta; inthlan pawh kan hnaih leh ta hle mai, Mizoram hi ‘|angpuihna’ah a lut thei dawn em? MNF sorkar hi term liam ta i.e Opposition-a an awm lai huna an inbeisei ang ‘sorkar ta ila tih’ kha chu an thleng lo tih hi an inhria/hmuin ka hria.