“Mizoram Politics Bihchianna”

C. Lalnundika
Mizoram Reform Movement

Mizoram Politics Bihchianna tih lehkhabu hi Advocate K. Remruatfela ziak a ni a, ani hi Mizo thalai ziak mi zingah chuan mi hriat lar leh thu leh hla lama thawh hlawk ber pakhat a ni. He lehkhabu hi Dan Hriatna Legal Journal published a ni a, Guwahati-a print niin phek 200 a awm a, cheng 300/- man tur a ni.
Mizoram Politics Bihchianna lehkhabu ziak hi awlsam thei ang bera sawi dawn chuan, “mi nawlpui hriatthiam phak tura Mizoram Politics tarlanna” ti ila a ziaktu rilru kan tawmpui thei hnai vai ber mai awm e. A ziaktu hian Mizoram Politics lo indin chhoh dan atanga tanin Tuna MLA term(2023) thleng hian ngaihnawm takin Mizo ten Politics kan lo kalpui ve tawh dan te a thlir kual a. Mizoram Kilkhawr ber ami te thleng pawha Politician ten Mizoram an lo kalpui tawh dan fiah taka an hriatthiam phak theihna turin thu harsa pui pui leh hriatchian loh te sawi lovin, thu tluang tlam tak hmangin ngaihnawm takin Mizo ten Politics kan lo kalpui ve tawh dan a sawi kual a, a thuziaka thil thlengte a hun lai hre pha tan chuan lunglenna kai tho thei tur a nih bakah, thil thlen dan ngaihtuah let a, mahni ngaihtuahna kawm melh melh a awl khawp ang.
He lehkhabu ziaktu hian felfai takin lehkhabu ruangam a din chho a, inphaman chho remchang takin thuziak te hi chhiar nuam leh hriatthiam awlsam thei turin a dah khawm thiam hle. A chhungah hian Thupui hrang 21 a awm a, hlawm lian deuh pathumah heng Mizo District Council hun lai Politics, Mizoram Union Territory hun lai Politics leh Mizoram State hnu lam Politics te hian kan then thei ang. Heng hun laia Presidents Rule-a Mizoram kan awm lai Politics pawh thiam takin a tarlang bawk a ni.
He lehkhabu ziaktu hian kum 1925 chu Politics-a Mizote kan harh chhoh tanna niin a sawi a, hemi atanga Mizo ten Politics kan hriat chhoh ve dan leh Politics-ina min nghawng chhoh dan atanga tan chhoin, Politics huanga inhnialna awm tam tak a rawn chai chho a, vawiin thlenga inpuhmawhna awm thinte pawh a lo irhchhuah dan leh thudik zawk a bulthum atangin ngaihnawm takin a tarlang a, a tanhmun tichak turin document nen a tarlang zel te hi a fakawm tak zet a ni. Vawiin thlenga thu inchuh awm pakhat – Mizoram Excluded Area – Mizoram hi India chhunga awm thin kan nih leh nih loh inhnialna chu mithiam tak tak thuziak atangin a thlir kuala a, heng Pu Keihawla MCS te, Pu Tawnluia, MNF Snr Vice President, tuna Dy CM ni mek te, Pu R. Vanlawma te, Pu R. Zamawia te, Pu C. Zama te, Pu Isack Zoliana te, NorthEast chanchina mi thiam bik Prof Sugal Nag te, Mizo Rajya Sabha MP hmasa ber pu R. Thanhlira te, Pu H. Vanthuama te, Naga pa ropui AZ Phizo leh PM Jawaharlal Nehru lehkha inthawn te leh Ex-Minister Pu C. Chawngkunga te thuziak hrang hrang chu a khaihkin kual vel a, tunge ziak dika tunge ziak dik lo tih pawh document tha tak nen a tarlang a ni.
Mizote hi India hnuaia awm lova British Crown Colony-ah kan awm theih leh theih loh chungchang inhnialna pawh Pu K.Remruatfela hian fiah felfai takin a chhawp chhuak tha hle a ni.
Vawiin thlenga mi tam tak inhniala la ni reng “Mizoram Bawrhsap Mc Donald-a’n Pu Ch. Saprawnga a beng a, thangthar ten i ruhro hi la chhuakin an la hal duh ang” tih chungchang Pu R.Vanlawma ziah tun thlenga sawi hat tling hi he lehkhabu ziaktu hian ngaihnawm takin thu dik ber tarlan tumin a rawn chhawp chhuak bawk a ni.
Mizo lalte lalna ata mipuiin zalenna kan neih chhohna tura Mizoram Political Party hmasa ber Mizo Union Party lo ding chhuak kha Mizoram Political History-a thil ropui ber pakhat chu a ni reng tawh ang. Amaherawhchu, kan hruaitu hmasate zingah nihna neih leh thuneihna chan duhna ten thawhhona tha leh inrintawnna boruak a siam thei lo a ni ngei ang tih he lehkhabu ziak atangin kan hmu thei a ni. Mizo District Council vawihnihnaah phei chuan Council rin tawklohna (No Confidence Motion) chu a hmasa berna ni turin put luh a ni ta hial a. Upa ten a bilha tho lo an tih ang deuhin Mizoram Politics inlumlet dan kha an nghet lo em em mai a, hei hian Party leh pawl thar a rawn hring chhuak ta nual reng a ni.
District Council vawi thumna (1962-1970)-ah hian Politics-ah thil lian tham a thleng nasa hle a, MNF dinhmun rawn kâng chho zelin, Mizo thalai lehkha thiam zingah Nationalism chi a intuh nasa hle a, ram a la duai duai a ni ber mai. Hei hian Mizoram chu Rambuaiah min hruai lut ta a nih kha. He lehkhabu ziaktu hian he distric council term hi “Mizo History-a hun pawimawh ber leh buarchuar ber a ni hial awm e” a ti thlawt a ni.
He lehkhabu ziaktu hian District council leh UT hun laia kan politician-te inzah der tawnna hi a ngaihlu hle tih a thuziakah hian kan hmu nual dawn a, Pu Ch.Saprawnga’n “No Confidence Motion” pu luttu Pu KC Lalvunga te tana sawrkarna pek a ui lohzia te, UT Chief Minister hmasa ber seat Pu Ch.Saprawnga leh Pu Ch, Chhunga ten an inhnawn kual vel dan a tarlan atang te hian kan hmu thei a ni.
Mizo District Council hun chhung (1952-1970)-ah khan Mizo Union kha Mizote politics luahlumtu ber an ni a, Union Territory dinhmuna kan luh atang kha chuan People’s Conference Party (PC) leh Indian National Congress te kha hmun chang tam ber an ni a, Brig. |henphunga Kaihhruai PC party phei kha chu Mizote tana beiseina thar lo chhi nungtu ni hiala sawi thin a ni a, thawm pawh an nei lian hle. Amah Pu |hena ngat phei chu Mizote tana Mosia nih tling khawpin mipui ten a hun lai kha chuan an ngai a ni. He lehkhabu ziaktu hian chiang leh ngaihnawm takin a rawn tarlang thei hi a fakawm hle a ni.
Kum 20 chhung Rambuaia kan awm hnuin MNF leh India sorkarin kum 1986-a inremna thuthlung an ziah hnuah India ram State zinga ralmuang bera kan lut chho thei ta hi a lawmawm hle a ni. He lehkhabu ziaktu hian Dan mit atanga enin MNF leh Indian sorkar inremna chungchang a thlirkualna hi a ngaihnawm bakah thil hlu tak a ni. Indian Dan pui bera Mizoramin a bika invemhimna kan neih awm chhun Article 371G duh khawp lohna leh a hun laia MNF ten mithiam zawk rawn lo leh an mahni pawl ami ni lo inrawlh an phal loh avanga kan inhumhimna neih chhun duhthusam ang a nih lohzia he lehkhabu ziaktuin a tarlante hi chhiara, zir chian tham tak a ni ngei ang.
Mizoram chu kum 1987-a State kan nih hnuah vawiin thlengin Party pahnih – Mizo National Front(MNF) leh Indian National Congress(INC) ten a inchhawkin min kaihruaia, kum 36 zet chhunga mizoram Politics an kaihhruai tawhnaah hian sawi tur a tam thei viau awm e. He lehkhabu ziaktu hian MNF leh Congress hruaitu Pu Zoramthanga leh Pu Lal Thanhawla te hmalakna ropui leh chhuanawm tak tak a tarlan karah an ministry laia thil duhawm lo thleng a chhawp chhuakte hi inenletna tur tha tak a ni. Mizoten tha taka Gospel Centenary kan lawm theihnana CM pu Lal Thanhawlan a CM term a titawi te , CM Pu Zoramthanga kaihhruai hnuaia Mizoram tana thil rotling tak tak kan neih chhoh te hi he lehkhabu ziaktu hian kan CM lo ni tawhte pahnih ropuina a tarlang thiam hle a ni. Chutih rual chuan, an chet fuh tawk lohna lai leh duhthusam loh lai pawh insum kar miah lovin a tar lang tel hi he lehkhabu chhiar tichakawm zualtu a ni ngei ang.
Kan hma lawk thla hnih khatah mai hian Mizoram State Election a awm dawn a, Mizoram mipui ten he lehkhabu “Mizoram Politics Bihchianna” Ukil K. Remruatfela ziak hi chhiarin kan hruaitute lo tihfuh tawk loh lai leh an tih fuh laite enlet ila, zoram tha zawk, zoram nuam zawk siam thei turin kan hun liam ta atang hian i inzir theuh ang u.