Mizoram Super League X Inkhel pawn pam phlirvelna

Mizoram Super League X
Inkhel pawn pam phlirvelna
Sharda University Mizoram Super League X khelh chhunzawm zel a ni a, a hmawrbawkna lam hawi chhoh a ni tan ta bawk a, inkhel a hmuhnawm zual sauh e. Tun tum chu MSL X leh a chhehvel thlirna kan nei ang – nizan inkhel result erawh he thu buatsaih lai hian kan hre hman lo.
Commentator
Mizo basketball inkhel live commentary tha ber sawi dawn ila, Darliansanga (Uncle Dara) hming hi a ri ring ber a nih loh paw’n a dawttu a ni bik hauh lovang. MSL X ah erawh rin loh lam daih atangin Mission veng tlangval Ahruaia a rawn inlan nawlh a, ani hi MSL team tha ber te zinga mi Khatla TBL coach hlui a ni.
Rin aiin a ti thei phian a, mut erawh a chhuak lek lek thei – a awki a hniam lam hret, ‘wow’ deuh leh bengverh pawp thawm a tlem hle. A commentary a hriam tawk lova, venthawn a nei lian – duh tawkin ngampa takin han lipse ngat se, inkhel entu bengvarna tham hi chu Ahruaia hian zan tam riak a pai reng.
Chutih rualin, thawhpui theih leh inphah hniam thei mihring puitling a ni a – for the love of the game tih thupui nei tan chauh lo chuan ani ang. Mizorama coach tha ber kan neih mek tan hian MSL X commentator ni tura ‘yes’ tih hi hna thlanawm ber a ni lo – zahna chibai a pualin ban ding lam kan phar chhuak e.
R. Dengthuama Indoor Stadium
a tawp ta rih lo
He infiamna inpui hi inthiarna hmun atangin thlekin bihchiang ila, duhthusam chu a ni lo nang a, a tawp ta rih lo! He hmun enkawltute hian a hmuna inkhel en chhimtu an tam zual hunah pawh an hna, faina hi tlin zel se.
Vengtu (security) lam
Salem Br. YMA inkhel viltu leh vengtute (security) hian gate luh phat atangin lirthei dahna an lo chingfel nghal zung zung thin a, MSL X hi chhungkuaa naupang te nen lama en ngam leh tlak tur khawpin tum dang ang bawkin an siam a, an hna an tlin.
MSL X a hmuna entute
Basketball a nih chuan inkhel entu mipui rak leh ri bengchheng bawlhhlawh, mi dangte tana harsatna siam khawpa khawsa an awm ngai lo – hei hi Mizo basketball ngainatute ze zahawm leh chhawm nung tlak reng a ni.
Mipui nawlpui hawihhawmna in a ken tel zingah player-te tui in ruahna bottle in inkhelh zawh rualin bawlhhlawhbawm a thleng nghal zel – fai hi entute leh inkhelte tlin zawng tak ni zel se.
Tarlan remchang zui tak chu, Zonet Cable TV Pvt Ltd in inkhel hi Youtube lamah a thlawnin an pe chhuak a, mi sang chuang thlirtu an nei thei reng – MSL X in bengkhawn a hlawh e.
Match official
Inkhel nghawng pawi thei official lam thutlukna vantlang hriata puak ri hluai a la awm rih lo. Hnam dangin sawisel an ngah zual a, a hmuna tawngkama chingfel zel match official ten thlei bik an nei lem lo. Mipui mit fuk khel a, lansarh tum hmel a lang ngai lo!
Head coach pathum
Saron BC boss Vanlalnunsanga (Lana) hi thutlukna leh risk la huai ber a ni ang. A player-te a hrechiang a, an theihna a hre hneh hle.
Zemabawk BC head coach Sangpuia hi mipuite titi siam hak phak team game chhawpchhuak a, barakhaih result thlentu ni thei leh MSL X a hnam dang (vai) chah lut tha ber a ni.
Heng karah hian player tha, star player rual kilkawia ho khawm thiam leh dawhthei ber chu an match hmasa tum hnih chak lova, tum thum point za chin rawn nei zui thei Zarkawt BCA big boss Marc Tetea hi a ni ang. Ani hi bench player-te chunga rinna nghat ngam ber leh chhawr nasa ber a ni – stats. en in a chiang.
Player of the match
An match zawng zawnga player of the match chawimawina dawng vek awmchhun Khatla TBL hian Emmanuel (3), James (2) leh |hazuala (1) te hmangin MSL X MVP ni thei awm an kawl.
Zarkawt BCA tan player pali in tum khat theuh POM hi an la tawh – Matthew Sailo, Cunningham, Lalrina Renthlei leh Zonuna te an ni.
Chanmari BC tan pawh mi pali bawk POM an ni tawh – Lalnunsanga, DG Maggee, Moses leh Big Mike. Zemabawk BC pawh hian an captain cool Rozama (1), Perkins Jr. (2), Rinchhana (1). Champhai BC tan Lalropuia (2) leh DC Franklin (1) te pahnihin POM chawimawina an hawn tawh bawk.
Saron BC tan T. Lalhriatzela (2) leh A. Tyagi (1) te an par tawh bawk.
Electric BC leh Bungkawn LB erawhin League Round hnuhnung bera an innuai hunah POM ni phak zawk an inchuh tel ang, team 8 zingah hian league round lama POM chawiawina dawng pha lo team an awm dawn – Electric nge Bungkawn LB ni ang tih chu zanina an inkhelh zawh rualin a hriat ang.
Mizo nge hnam dang?
Chik leh chip melh melha inkhel lo bih leh lo thlir thin tan MSL X ah hian khelh fuh loh ni rau rauah pawh hnam dang player an vannei – hun an chang tam zawk zel. A nawrtu (offense) lama an hlawhchham changin venghimtu (defense) ah hnam dang abikin mi dum (black) te hi an chetha tlat zel a, hei hian inkhelhna hun an neih tam phahin a lang – defense lamah mi dum (black) erawhin tha an khek thei, an tumpui player tha an veng lo deuh zel.
Heng karah hian hmanni maia American basketball coach tha mi Bryan (IG – Bryanmeansbasketball) lo kal tuma The Aizawl Post Hoops Mania lamin interview kan neih khan ball kengtu (guard) lama Mizote that zia a sawi kha a dik zia nemnghehin a awm – tum 24 zet player of the match lawmman sem chhuah atangin vawi 13 lai dawngtu chu Mizo guard position a khel an ni.
Anni lo mi pathum Mizo tho position danga khelin POM hi an hawn a, hnam dang (vai) in tum khat leh mi dumin tum sarih chauh – MSL X kan thlen meuh chuan basketball hi Mizo te thiam leh khelh chi tak a nih thu hi eng zawlnei puan sak mah kan ngai ta lo!
Mizo tawng hman uluk ni se
Mizo tawng hman uluk tawk loh tamna em em chu hnam dang film letlingtu lamin uluk mang lova tawng an letling thin kha a nih thu kan Mizo tawng duhfirten an sawi fo.
Live telecast-ah ngat phei chuan tawngkam uluk leh dik a ngai a; tunhnaia zai thiam pakhatin selna a tawh lian deuh chu sap awphawia Mizo tawng a lam thin kha a ni, heng hi MSLX puipa lam hian vil uluk se la, inkhel hmuhnawm chhawpchhuaktu lam hian tawng venhimna kawngah tha an thawh tel thei dawn a ni.