Mizoram Super League X
Superman |hazuala – 35 pts!
Sharda University Mizoram Super League X semi finals hmasa zawkah team nghet Khatla TBL in kai thar Zemabawk BC chu 100 – 91 in an hneh a; relegation playoff lamah Saron BC in Bungkawn LB Associates chu 92 – 83 in an hneh bawk – semi finals leh relegation playoff hi best of three series a khelh tur a ni.
Semi finals game 1 inkhel inhnehtawk takah hian Zemabawk BC lamin bul tan fuh zawkin, 1st half-ah khel hmuh nawm bik Rozama (24 pts) zunzamah mipui an thle dual dual a, thawm a tha in khuang ri a ring hle!
Zemabawk BC innghahna Perkins Jr. (34 pts) chu court chhunga roreltu a ni zui a – captain cool Rozama leh an Perkins Jr. hian thlawptu an nei tha tawk lo thung!
Zemabawk BC tualchhung player defence pawr leh chhia bakah N. Beniwal zawi lutuk tuartu chu Zemabawk BC leh anmahni tantu Zemabawk mipui te an ni a – inkhel entu tam zawkin Rinchhana 3 pts lut thei lo thlawt lo leh Jacob-a defence pan lutuk mawlh kha sawisel zui pawh ni se, an coach Sangpuian siam that hna a nei tihna a ni mai!
Kanan tlangval Rozama leh Perkins Jr. anga tharum leh thahrui zawng zawng nena Khatla TBL hneh let tur hian Zemabawk BC player-te hian theihna leh tawiawmtu mipui an nei – an kutah engkim a awm zual ta.
Superman |hazuala, Khatla TBL in sang taka layup a thiam zia leh a tlanchak zia kha hahni ro thawta sawi zui tur a tam hle – player of the match nih a phu takzet!
Court chhunga minute 34:03 chhung hun hmangtu Emnanuel-a (23 pts) heti taka a chet that theihna kawngah hian kawng sial saktu an coach Mapuia hian fak a phu – a phu thlawt!
|hazuala leh Emmanuel-a te speed sanzia mawlh kha ennawn leh tham a ni. Heng karah hian offense lama tal na tawk lo, defense lamah erawh TBL banpui Dennis-a leh tualchhung tlangvalte khan basketball hi team game a nih zia an nemnghet nawn e.
Zemabawk BC hian Khatla TBL hneh ngei tuma an insawrbing leh, Khatla TBL lamin Zemabawk BC MSL X zin kawng tih tawp an tum tur hi a hmunah ngei thlir a manhla ang.
Hoops Mania Time Out
Zonet Cable TV Pvt Ltd lamin a thlawna inkhel en theih hun bi, an Youtube channel lama an tihchhuah thin chu an tihtawp tak avangin inkhel entu mipui R. Dengthuama Indoor Stadium lamah an pung thut!
“Kan inkhelhna hmunhma min dim sak a, security te thu min ngaihchan sak turin mipuite kan inngen e. Him leh hlim taka inkhel rawn en chhunzawm zel turin kan insawm bawk e” tiin Mission Veng pa, Pu Zomuanpuia (MBBA Secy.) chuan mipuite hnenah ngenna leh sawmna a siam.
-- Advertisement --
MSL Knockout Round
April 10, Ningani zan
Relegation Game 2
Bungkawn LBA vs Saron BC – 5:30 pm
Semi finals Game 2
Zemabawk BC Vs Khatla TBL – 8:30 pm