Mizorama party zingah BJP sum dawng lo chu Congress – MPCC vice president
2023 MLA inthlanpuia chuh ho Mizorama political party zingah BJP tanpuina sum dawng lo chu Congress party chiah an ni a, hemi phatmar tumte chu a tul dan angin an la phochhuah dawn tih Mizorama BJP hruaitu pakhat chuan a sawi tih Congress vice president Lalnunmawia Chuaungo chuan a sawi chhawng.
Congress Thalai Hqrs. huaihawta Inrinnia Lok Sabha inthlanpui atana Aizawla vantlang inkhawm buatsaihah MPCC Campaign Committee chairman ni bawk Lalnunmawia Chuaungo chuan Lok Sabha inthlan kan hmachhawn mekah BJP mangangin pawisak an nei lo tih a sawi a. Mipui ngaihdan laknaah BJP leh a thawhpuite dinhmun a hniam chak hle tih a sawi.
Tangrual pawl – Indian National Developmental Inclusive Alliance (INDIA) tih chhiat nan Central IT, ED, CBI thlengin hmanruaah an hmang a, Delhi chief minister Arvind Kejriwal chu jail tantir tumin an man a, party dangin a tul lai taka sum an hman theih lohna’n an account khawihchet theih lohin an siam a; democracy a awm tawh lo tih sawiin, khawvel ram dang US palaite leh UN hruaitute pawhin BJP sawrkar chet dan chuan inthlanna muanawm tak neih a ni lo palh ang tih an hlau hle tih a sawi a ni.
State BJP hotu pakhatin 2023 MLA inthlanah Mizorama political party zingah BJP tanpuina pawisa dawng lo chu Congress party chiah a ni a, hei hi phatmar tum an awm chuan a la phochhuak dawn tih a sawi thu sawi chhawngin, “Mizoram mipui tana him lo BJP thawhpui leh mai tur leh an tha tichaktu tur MP nge kan thlan dawn, BJP tha chhattu tur MP ngaihtuah nawn turin ka ngen a ni,” MPCC vice president hian a ti.
2024 Lok Sabha inthlanpuia MIzorama Congress candidate Lalbiakzama pawhin thu sawiin, kum 2014-a BJP a sawrkar atangin Kristiante chunga hleilenna leh tharumthawhna a hluar nasa a; kum 2014-ah Kristiante tiduhdahna vawi 147 a thleng a, 2023 khan vawi 687 a thleng tih a sawi. “Heng Kristian tiduhdahtute hi police-in man ve bawk mah se, reiloteah an chhuak a, jail atanga an chhuahin BJP MLA leh MP ten parthi nen an lo hmuak thin,” a ti.
Kohhran leh pawlin ram pawn atanga tanpuina an dawn thin chu BJP sawrkarin a titawp vek a; hnuchham enkawlna, damdawi in leh zirna in tam takin harsatna namenlo an tawh phah, tiin, he thil titawp tur hian Mizoram mipui tanrual a ngai tih a sawi a ni.