Mizoramah HIV kai sing 2+ Kum 25-34 inkar an tam ber

Mizoramah HIV hrik kai 29514 an awm tawh a, kum 25 leh 34 inkarah tam berin, sing khat chuang a ni. He natna thihpui mi 4703 an awm tawh bawk.Mizoram State AIDS Control Society chhinchhiah danin, HIV kai hi chi hnih – nu rai lai (antenatal care) leh a bak zawng ‘general clients’ a then a ni a. 1990 October atanga HIV kai an chhinchhiah tan atanga 2023 September thleng khan general clients-ah mi 27080 leh antenatal care (ANC) ah 2434 hmuhchhuah an ni tawh a, an vaiin 29514 a ni. General clients atanga HIV kai an hmuhchhuah zingah ruihhlo ti, inchiuna hriau inhmantawm atanga inkai chhawng an tam ber a, zaa 68 chuang hret a ni.
General clients bik hi an kum zat bithliahin group 5-a then an ni a. Kum 14 hnuailamah HIV kai 753 an awm a, kum 15-24 inkar 5894, kum 25-34 inkar 11358, kum 35-49 inkar 7468, kum 50 chunglam 1607 an ni.
Kum 16 kalta chhunga thisen endik zat leh HIV kai hmuhchhuah zat thlirletin, 2007- 2008 ah chuan mi 5000 tling lo deuh thisen endik atangin HIV kai 233 hmuhchhuah an ni a, 2008- 2009 ah mi 20741 thisen enfiah atangin HIV kai 737 hmuh a ni. 2009 hnulamah hian thisen endik hi mi sing 3/4 chuang vek ni chho char char tawhin, HIV kai hmuhchhuah pawh sang a chuang chho vek tawh.
2017- 2018 ah HIV kai hmuhchhuah hi sang hnih a kai chho tan a, Covid len lai, 2020- 2021 (1900) leh 2021- 2022 (1601) ah a tla leh hret tih loh chu 2022- 2023 ah pawh sang hnih a pel chho leh tawh a ni.
He kum 16 kalta chhung vek hian nu nau paia HIV hmuhchhuah pawh kumtin za chuang a ni vek a ni.
Kum 2006-a MSACS-in a chhinchhiah tan atangin, HIV kaiten damdawi an lak thin, ART (antiretroviral therapy) la turin Mizoramah inziaklut 23857 an awm a, heng zinga 685 chu naupang (kum la tling lo) an ni. Heng zinga 21303 hian ART hi a tak takin an la thung a. Heng zinga 629 chu naupang an ni.
Mizoramah HIV kaihhnawiha nunna chan mi 4703 an awm tawh a, heng zinga 80 chu naupang an ni.