Mizoramah Nurse-te Ni hmang
Modern nursing hmuchhuaktu Florence Nightingale piancham denchhenin kumtin May 12 ah International Nurses’ Day (Nurse-te Ni) hman thin a ni a. Kuminah Mizoramah chuan Pathiannia a tlak avangin May 10 leh 11 khan mahni remchan dan angin Mizoram district hrang hranga nurse – hospital-a thawkte, zirna ina thawk leh pensioner-ten he ni hi an hmang.
Kumin thupuiah “Nurse-te kan hmabak leh innghahna, ram lehhnam hmasawnna atana mite hriselna vawngtu” tih hman a ni a. May 6-12 inkar kha Nurses’ Week hman niin, Mizorama nurse-te pawhin Trained Nurses Assocition of India Mizoram Branch hmalaknain khawtlang tana thil tha hrang hrang tiin hun an hmang a ni.
Nurses Day pual hian hospital leh Nursing College, Nursing School leh ANM School hrang hrang chuan Blood Donation Camp neih, Home hrang hranga sumfai, thuamhnaw leh ei tur pek; school hrang hrangah zirlaite leh zirtirtute hriselna chungchang zirtir (health talk); sawrkar office hrang hrangah a thlawna BP leh blood sugar endik sak, damdawi ina damlote ei tur sem, Nurses Day cake sem, thingtlanga free clinic neih, home visit leh NCD screening neihtea hmang an awm a. Kumin thupui zirhona, intihhlimna hrang hrang leh ruaite thehin nurse-ten hun an hmang a ni.
College of Nursing Synod Hospital Durtlang assistant professor Rongurliani chuan, kum 2024 International Nurses Day thupui atan International Council of Nurses chuan “Our Nurses, our Future, The Economic Power of Care” tih thlangin, a tum ber chu am hmasawnna atana pawimawh tak, vantlang hriselna kengtu zinga pakhat chu nurse-te hi an ni a, an tana sum kan sen let ve te, kan thuamchak zelte hi ramin sum a dahthatna leh a peipunna zel a ni tih hriat a ni tih a sawi.
“Policy duangtute, healthcare lam thuneitute leh mipui mimir pawh hian, nursing lama sum senso hi awmze thui tak nei a ni tih kan hrechiang tawk lo deuh maithei a. Covid-19 len lai thlir let chuan, a hmatawnga thawktu berte chu nurse-te an ni. An nunna thapin, mahni in lum pawh rei tak chhung haw thei loin, hnathawhna hmuna riahchilhin, chhungte nen pawh inhmu thei loin damlote tan an hun leh nun an pe a. Amaherawh, chutianga thawktute chu an himna tur leh natna an kai lohna tura hmanraw tha, lawman tha zawk thuneitu leh a hna enkawltuten an ngaihtuahsak em, an thuamtha tawk em, tihte ngaihtuah let a tul,” Rongurliani hian a ti. Nursing leh hriselna enkawl leh humhimna atana hmasawnna chhenfakawm kan neih theih nan nurse-te hna hlut thiam a, humhim a, zah leh thuamchak zel chu mipui leh thuneitute mawhphurhna a ni tih a sawi a ni.