Mizote leh Nationalism

Ram leh hnam hmangaihna rilru avangin MNF khan March ni 1, 1966-ah independence a puang a. A hnu lawk March ni 5-ah India sawrkarin jet fighter hmangin Mizoram a rawn bomb a, vawiin a champha kan lo thleng leh ta. Khawvel a awm chhung chuan March ni 5 hian sawichhuah a hlawh reng tawh dawn niin a lang.
Nationalism awmzia sawifiahna tawi fel leh fun kim ber nia lang chu “Ram leh hnam hmangaihna” tih hi a nih a rinawm. Mizoram hi ram pakhat chhunga state pakhat mai kan la ni a; ram dang awp behna tel lova mahnia ro inrel ram – Nation/Country (political science hnuaiah chuan state tiha sawi thin) la ni pha chiah lo mah ila, tuna kan awmna ram leilung leh a chhunga cheng mihringte hmakhua ngaihna hi keini tan chuan kan ‘nationalism’ a ni a, chutiang rilru pu mi chu ‘nationalist’ tih an ni.
Khawvel ram hrang hranga Zofate rorelna pakhat hnuaia kan khawsak ho theih hun tur hi kan thlir a, eng tikah emaw chuan hei hi a la thleng ngei ang tih kan ring hlawm a. Chutianga kan khawsak ho theihna tur chuan tun atangin hma kan la a, tuna thahnemngaia a meizang hlaptute hian rorelna pakhat hnuaia kan kunho theih hun chu an hmu pha kher lo maithei a, mahse tu leh fa, chhuan lo la awm zel turte tana tuna thahnemngai taka beihna hi ‘nationalism’ chu a ni.
Tun kan dinhmun han thlir hian, ram leh hnam hmangaihna rilru pu nia kan inhriat dan leh kan inhmuh dan hi her rem ngai a awm niin a lang. A hmasa berah chuan politician-te an pawimawh em em a, politician-ten ram leh hnam hmangaihna rilru an put phawt chuan, mipuiin an hniakhnung kan zui lo thei lo dawn a. Chutah chuan dinhmun nghetah kan ding ang a, chu chuan hnam a ko khawm dawn a ni.
Israel ram pawh dinhmun ngheta an insiam hnuah khawvel ram hrang hrang atangin Israel mite an haw khawm ruih ruih a nih hi.