MIZOTE POLITICS THLIRNA

By P.C.Lawmkunga

Kum 77 zet (1946-2023)-a upa Mizote politics standard a changkâng thei hauh lo hi nau vei taka vei tham a ni ta! Kan ram hmasawnnain ke a chhep fuh ta lo hi politics kan kaihlek vang a nih loh chuan puh tur dang a vang khawpin a lang. Kum 1946-a Mizo Union party a din atanga vawiin thleng hian kan ram hruaitu politician kan tih te hian he kan ram te tak te âr hmai tiat lek hi heti chen lek min thlenpui chauh mai hi kan phun mur mur a, a tihngaihna chu kan hre chuang hlei lo va.
Mi ram leh State te chuan politics (famkim bik lo mah se) hmangin an ram an tichangkâng a, kawngpui tha leh tlo, buh leh bâl, kawlphethâ leh tui thianghlim hman tur nen an hnianghnâr tawh a. Chutih lai chuan kan Mizoram zimte, mihring tlemte awmna chu eng kawngah mah intodelhna nei lovin pâwn lam atanga châwk luhin kan intung nung ve hram hram rei ta hle mai! State ralmuang ber kan ni, kan ti a, mahse vaibuh leh vai chawhmeh (sa leh sangha thlengin) kan ei a thulh chuang lo va. Kristian ram leh Biak In ropui tamna ram kan ni kan tih laiin kawngpui tha leh tui thianghlim in tur kham khawp kan neih phah chuang si lo te hi, a chhan i han dap dawn teh ang hmiang.
Politics kawngbo:
Isua pian hma atanga Grik hovin an lo hman tawh politics hi khawtlang inawpna tha, khua leh tuite hamthatna atana din a ni. Chu mi dungzui chuan mipui rorelna democracy kan tih fo hi an duang chhuak leh a. He politics dik leh democracy tundinna ram chu khawvela ram changkâng leh intodelh an ni zel mai. India ram ngei pawh hi kan chekhnawk hle nain ram hmangaihna politics hman a nih avangin (a buarchuar lai te chu lo awm ve bawk mah se) vawiinah chuan khawvela ram ropui ber pangate zingah a tel pha ta. Ei leh bar, sipai leh ralthuam leh vansanga inelnaah pawh khawvel ram dangte zah tham a ni tawh. He ram ropui tak chhungah hian State leh UT 36 kan awm a. Chung zinga a chawrchê ber chu Mizoram a ni kumkhua mai hi a lungchhiatthlâk mai ni lovin a thinrimthlâk ang reng hle tawh a ni.
A chhan chu politics kawngbo kan ‘khelh’ vang a ni, ti tawl mai ila, a chiang ber ang. Sawrkar siamtu political party te reng reng hian an sawrkar kha mipui sawrkar ni lovin an Party sawrkar, an party mi leh sate hamthatna tur chauh emaw an ti tlat mai a. Policy leh manifesto tha tak tak te chu han vawrh chhuak thin mah se, a takah chuan mipui vantlang chan tur kha a awm ta thin lo va. An flagship program, NLUP, MIP, SEDP te hi an party inhung bikna thirhlingnei a ang ber, mi dang tan luh ve theih a ni lo. Ruling party mi nih loh chuan ro vawng vawng tura inngaihna lian tak kan nei ta a nih hi. Democracy kha inthlan zawhah chuan an titawp ta daih emaw tih turin party mal rorelna (totalitarianism) ah an chantir a ni ber mai.
Kan politics standard a hniam hle: Politics kawngbo khel tan chuan politics hman dik chu a harsa ta ngei reng a. Chutiang politics chu a hniam em avangin party rawn zawmtute rilru leh chezia pawh san ngaihna a awm ta reng reng lo va. Kha party an va zawm chhan mumal tak kha va sawi chhuah aiin an thusawi hmasak ber chu party dang leh an hotute sawi chhiat a ni ta mauh mai thin a. Entir nan, Party zawmtu tute emaw chuan party dang hruaitu tu emaw BJP zawm tuma Guwahati-a a zin leh zin loh chu an buaipui em em a, zawt fiah turin Pathian hming meuhvin mipuite an sawm hial a nih kha. Hei hi politics level sang tak a ni thei lo vang.
Tin, mi thenkhatin rei tak an lo awm tawhna Party an han chhuahsan a, ârachuktuilova an awmna hmasa party an han sâwt leh te hi mipuite tan han ngaihsan hi an har hle bawk a. Kohhran mi, tawngtai mi leh inkhawm mite meuh pawh he politics hri chhia hian a nuai ve tho mai. He mi letling chiaha party tana mi rinawm te erawh chu an lo la awm tho mai a. Chung mite chu candidate ni tura nomination chang lo emaw, ruat tawh zet tihdanglam sak leh te emaw te, titau chuang lo va, an party-a la awm zui zel te hi an ni. Hetiang mite hi Mizoram politics-ah chuan, thil vâng (rare commodity) an niin, ngaihsanawm tak an ni ve leh thung a.
Chutih laiin mi thenkhat, an awmna hmasa party, hamthatna tam tak an lo neih tawhna party an chhuahsan chhan belhchian dawl uk lo sawia, bei zui thintute erawh hi chu politician pawh ni pha lo, mimal hamthatna chauh ngaihtuaha vâk vel ruai an ang ber. Hetah hian Pu Lalrinliana Sailo leh Pu R.Lalzirliana te hi an danglam hlein a lang. Congress party an chhuahsan hnu hian Congress party leh an thawhpui thin CM leh Minister dangte an sawichhiat zuina hi mipuiin kan hre hauh lo a nih hi.
Bauh loh tur an bauh: Mipuiin kan lo chhinchhiah chian em em pakhat chu rorel lai party-in eptu lam party an ep lêt hlauh va, mahni party policy leh hmathlir te sawi hman lo lêka an buai thin hi a ni. Party tuai thar ber chu ruling party chauh ni lovin a eptu party dangte pawhin an beih thin hi. Hetia party pakhat ve mai ruling leh eptu party dangin an bauh rawn hian ZPM hian a lar phahin, mipui bengah ZPM a ri ring ta a nih phei chuan bauh loh tur an bauh a ni ngei ang. Chutih laiin an huphurh leh hlauhthawn anga ZPM hi inthlanna lo awm tura a che fuh lo a nih chuan Party dangte hian tha an seng thlawn viau dawn a ni.
Mipui an hruai sual:
Kan hruaitute hian thawhrimna aiin awlsam taka neih theih tur lam hi min kawhhmuh tam zawkin a lang. Chu chu pawisa fai dawn min tiam fo thin hi a ni. Party sum ni miah lo kha an party mi leh sate vulh nan tawktarhah an hmang thin a. A dawngtu tan chuan a lawmawm naran ve mai thei a, mahse din chhuahpui sawi tur hi an vang khawp mai. Chutih lai chuan mipui chan tur sum hrang hrang Sawrkar hnathawk hlawh, tar pension, health care etc atan te sum a chatlak deuh reng bawk si, intuha lo tak a ni. Aizawl khawpui lirthei tâwt lutuk chu an vei vek a, mahse a titâwt zual turin taxi leh 2-wheeler permit a sang tel an sem leh chur chur bawk si! Ei leh bara intodelh sawi ve si a, a pawimawh ber Agriculture leh a kaihhnawihte tuai thar ‘revolutionise’ tumna awm ngai lote hi a mak hle a ni. Tunah tak hi chuan kan nunna hnâr ber agriculture hian mau leh chakai pawh a tluk lo a nih hi.
Kan chhe vek lo:
Mizote hi kan chhe vek lo va, sawrkar pawh a chhe vek lo, hna pawh a thawk ve teh meuh mai. Mahse kan politics upat tawh dan leh sum lo luh hnem dan hi mipui hian a tlangpui chu an hre vek si a, chuti chunga hetia kan la inawi leih leih hi an lung a kim thei lo a ni ber mai. He kan politics standard sang lo zet avang hian kan project tam tak a hlawhchham a. Sawrkarna chelhtuten ram hmangaihna takzet an tlakchham avangin contract work a dik thei lo va, chu chu hna-in a tuar a, kawng leh building a tlo lo va. Tui in tur kan tlachham deuhthaw fo va, kawlphetha lah a tlachawpin kan lei reng bawk. Chutih lai chuan Minister leh MLA te chuan anmahni hlawhte tisangin hamthatna hrang hrang an inpe châmchi a. Kan ram politics chu sumdâwnna, sum siamna hmun a ang ta ber a ni.
Hnathawh that leh rotling thil siam vanga tlin leh inring ngam political party pakhat mah kan nei thei lote hi a manganthlak a. Pawisa hmachhuana inthlan hmachhawn tum an nih phei chuan an tlin hunah pawh mipui hamthatna ai chuan an sênso hmuh lêtna tur an zawng leh ngei ang tih ring ila, kan ring sual lo vang.
Mi ropui Gen. Charles de Gaulle-a, French President thin khan, “Politics hi a pawimawh lutuk a, chuvangin politician te kuta dah mai chi a ni lo” a lo ti tawh reng a nih kha. Tute kutah nge kan dah tâk ang le?