MJA-in an member lawmpui

MJA Gen. Hqrs chuan Zirtawpni khan an member pahnih, an eizawnna leh hmalam hun atan pawimawha hlawhtlinna chang an chawimawi.
Indian Information Service (IIS) a tling, DDK Aizawl editorial assistant Andrew Lalchhandama leh journalism kaihhnawiha doctorate degree hmu thar East Mojo reporter Lalnunkimi Colney chu lawmpuina an hlan a, chawimawina thuziak leh sumfai Rs. 10000 an hlan. MJA president C Lalrambuatsaiha chuan, eng hna pawh thawk ila, hlawhtling tur chuan taima taka theihtawp chhuah a ngai tih a sawi a. IIS ah MJA member zinga mi a tling thei chu an lawmin an chhuang hle tih a sawi. Taima taka journalism lama theihtawp chhuah a, Phd hial hmu tura Lalnunkimi thawhrimna chu an chhuang tih a sawi bawk.
Kum 30 liam hnua Mizoram atanga IIS tling leh thei hmasa ber Andrew Lalchhandama hi a tum hnih hmachhawnnaah IIS-ah hian a tling a. Journalism lama thawnhriat a lo neih tawhna chu a chhawr tangkai hle tih a sawi. Lalnunkimi Colney hian Ph.D a tihnaa a thesis chu Mizoram buai kaihhnawih, mipui tawrhna leh hemi chungchang Mizoram chanchinbu, India ram media leh ram pawn lam media ten an ngaihven leh an tarlan dan lam a ni tih a sawi.