MJA-in inkhawmpui vawi 50-na hmang

Mizoram Journalists’ Association (MJA) chuan nimin khan DIPR Lianchhiari Run Conference Hall Aizawlah Inkhawmpui vawi 50-na an hmang a, Betsy Zothanpari Sailo, Addl Secretary Govt. Mizoram chu khuallian niin, district hrang hrang atangin MJA member thahnem tak an tel.MJA inkhawmpui hmanpuitu Betsy Zothanpari Sailo chuan chanchinbu mite pawimawhna sawiin, mipuite sukthlek hriltute an nih theih avangin kawng hrang hranga inchher hriam leh zual turin a fuih a. Thu lai la taka investigative journalism lama tan la leh zual tura sawmin, ram leh hnam mawina tura zau zawka chanchin lawmawm lam te theih darh uar turin a chah nghal a ni.
General Conference-ah hian C. Lalrambuatsaiha, President, MJA General Headquarters pawhin thu a sawi a, pawl nihphung sawifiahin infuih tharna thu a sawi a, RTI hman uar leh zual a tul thu a sawi bawk a ni.
MJA inkhawmpuiah hian kum 2023 leh 2024 inkara MJA member boral tate sunna neih a ni a. Lalrinmawia Sailo, General Secretary chuan kum 2023 leh 2024 inkara General Report pein, C. Lalhmachhuana, Treasurer, General Headquarters chuan Financial Report a pe nghal bawk.
MJA General Conference hi hun thumah then niin hun khatna hman zawh hian kum hnih (2024-2025) chhunga MJA hruaitu tur thlan an ni a. President atan president ni lai C Lalrambuatsaiha (The Aizawl Post) thlan nawn a ni a, vice president-ah chuhtu awm loin C Lalhmachhuana (Youth Herald/ Zalen) tlinga puan a ni a; treasurer-ah general secretary ni lai Lalrinmawia Sailo (Thlirtu) thlan a ni. Executive member mi 11 thlan chhuah an ni bawk.
Mizoram pumah MJA member 192 an awm a. Aizawlah 91 awmin Lungleiah member 20, Siahaah 12, Champhaiah 17, Kolasib-ah 14, Serchhipah 14, Lawngtlaiah 10, Mamitah 8 leh Hnahthialah member 6 an awm a ni.