MLA-in ‘model school’ puang “Kan fate hi kan khawlbawm”

Aizawl East II bialtu MLA B Lalchhanzova chuan a bial chhunga ‘MLA model school’ atan Chhinga Venga awm Govt L Buana Model Primary School a puang.
Chhungkuaah zirlai naupangin ngaihsak an mamawh tih B Lalchhanzova hian sawiin, thlamuang tak leh zalen taka lehkha an zir theih a tul a; an lehkha zirna tur dawhkan buatsaih sakin phur taka lehkha an zir theih nan an rilru, ngaihtuahna leh an hmanrua tur buatsaih a tul tih a sawi a ni.
“Nu leh paten kan rohlu chu kan fate an ni a, kan fate hi kan khawlbawm an ni. A enkawltu zirtirtute pawh mawhphurhna pawimawh tak chelhtu kan ni tih hrereng ila, zirlaiten school-ah hlim taka hun an hman theih nan kan mawhphurhna pawimawh tak hlenchhuak a, theihtawp chhuah zel turin ka sawm a ni,” a ti.
Govt. L Buana Model Primary School hian harsatna hrang hrang tawk thinin, khar mai theih dinhmunah pawh a ding tawh a. Khawtlang hruaitute, zirtirtute leh nu leh paten theihtawp chhuahin hma an la a, tunah chuan zirlai za chuang an nei a, naupangin zirtirna tha tak an dawng tih hrechiangtu an headmaster pawhin a fapa a luh tir a ni.