MLA Lalrintluanga Sailo a liam ta

Last updated Jul 23, 2025 5 0

MLA Lalrintluanga Sailo a liam ta
Dampa bialtu MLA Lalrintluanga Sailo (65) chu July 21 zan dar 9.00 vel khan New Delhi-ah a thi a. July 22 chawhnu khan thlawhna hmangin Mizoramah a ruang rawn thlenpui niin, vawiin – July 23 hian vui a ni ang.
MNF National Core Committee member nilai ni bawk Lalrintluanga Sailo hi kumin June 29 khan khawsik sang avangin inenkawl turin New Delhi panpui a ni a, Max Super Speciality Hospital-a dah a nih hnu, a tuk maiah ICU-a dahluh zui a ni.
Hemi ni atang hian that lam pan thei tak tak tawh loin ventilator hman ngaite in a awm zui a, Thawhtanni zan dar 9.00 vel khan a kal ta a ni. A natna hian a kal leh thin a khawih hman tawh nia sawi a ni.
Chhiat tawh thu an hriatin Delhi Mizo Welfare bakah New Delhi-a awm mek Home minister K Sapdanga, Assembly speaker Lalbiakzama, MP pahnih – K Vanlalvena leh Richard Vanlalhmangaiha ten a ruang hi an thlah a. Home minister hian a rawn zui haw a ni.
Lengpui Airport-ah minister, MLA leh MNF party hruaituten an lo hmuak a. Airport chawlhbukah hun hmanpui a nih hnu in, an chenna Luangmual lam panpui a ni. Lumenpui a nih hnu ah vawiin – Nilaini hian chhun dar 12.00 hian Luangmual Presbyterian Kohhran Centenary Hall-ah vui a ni ang.
Kum 1960-a piang Lalrintluanga Sailo hi kum 16 mi chauh niin, kum 1976 khan MNF rammu a zawm a, heta tang hian MNF hi inremna ziah hnu, tun thlengin a chhuahsan zui ta lo a ni.
Kum 2018 inthlanpui khan MNF party ticket-in Dampa bialah MLA atan thlantlin a ni a. Kum 2023 inthlanpuiah he bial atang bawk hian a tling leh a ni.
A nupui Lalbiakthuami leh a fate 5 a kalsan.

8 MLA Lalrintluanga Sailo thih thu ah hian political party – MNF, Congress, ZPM, BJP leh PC ten an uina thu leh a kalsan tak a chhungte an tawrhpuina thu an chhuah a ni. MNF thuchhuah chuan ‘MNF banpui rinawm a tliak ta’ a ti.
8 Larsap Gen. Vijay Kumar Singh (Retd) chuan a chhungte a tawrhpui thu a sawi a. Mizoram tana a hnathawh an hriatreng tawh tur thu a sawi a ni.
8 Chief minister Lalduhoma chuan legislator tha leh taima, thusawi thiam leh debator ropui, tia sawiin, a thihna chuan a thawngin a ui hle tih a sawi a. Kumin July tira Delhi a kal tumin damdawi inah amah hmuh theih a nih loh avangin Mizoram House-ah a nupui fanaute a tlawh a, a dam chhuah leh theihnan duhsakna hlanin tawngtaipui mah se, Pathian remruat chu hetiang hi a ni ta si tih a sawi a ni.