MLA Nih Tum Ngawr Ngawr?

Tpa Bunghai

Aizawl khawpui thalai bik hi chuan kan thupui ang mihring khi kan thliar thiamzia i hriat duh chuan two wheeler taxi driver, thalai infiammi, zirlai leh hnathawh avanga mipui hmaah leh Youtuber thenkhat bula ngaihdan sawi ngai lo tur chin hi titipui la, an ngaihdan zawt zeuh la – anni ho chuan MLA nih tum satliah ve tawpte hming an hrilh nalh nalh thei ang che.
Hetiang hi kan khawpui ber thalaite rilru a nih avangin kumin inthlanpui chu engemawti tak hian ngaih a tha a, thuneihna um satliahte hi a ram pum huapin kan hnawl hunpui kan thleng dawn a ang ta riau mai!
Inthlanpui apianga kan hmuh thin, Snollygoster (a person you can’t trust) an tih mai, mihring rin ngam loh a bikin politician zingah hian hei an rawn ther leh ta fur e.
An awmna political party-in an policy leh principle pawh an thlak lem loh, thuneihna leh sum it avanga mahni tanhmun thlak thut thung – engti zawng pawha MLA nih tum ngawr ngawr ang chi ho ‘transfer’ boruak hi tute mah hian kan thlir liam satliah ta lo tawp mai.
Tarlan tak angin khawpui thalai politics lam hnungchhawn deuh ngut thin ho rual, eng political party maha hming pe ngai lote’n ram hruaitu tur hi kum 5 zet a nih avang leh chumi nghawng thui tak chu chipin kan chik ta thup e.
Mahni bialtu MLA bathlara mimal hamthatna uchuak taka thlen tuma inlan ngai lo tur hi khawpui thalai kan va tam em!
‘Mipuite hi hruai ngai lo se, hruaitu an awm a tul nang’ titu Pu RK Lianzuala thu vuakthlak kha darthlalangah hmangin – party bil, duhsak zawng leh a pumpui tlang chhah laite chu fatu chanpual anga ngaihna hi kalphung hlui a ni tawh; hruaitu tha chuan ram leh hnam a huap ang chu maw le.
MLA nih ngawr ngawr ‘tactic’ nena mipui hmaa rawn inzuarte hi khawpui mai ni lovin constituency tinah lo vil uluk ang u hmiang.
Hei, thalai leh a ngaihna hria, politics huangah ring rawlh lo mah se, a hnam ang pawha kan chhuan tak takte hian ram hmangaihna avangin ke an rawn pen chhuah mek hi – chawikangtu nge mi tha awp hlum thei zawk Chief Minister tur ni ang tih tinzawn chungin VOTE thlak ang u.