MNF leh ZPM-in BJP do thu sawi ngam lo – Lal Thanzara
MNF leh ZPM-in BJP do
thu sawi ngam lo – Lal Thanzara
BJP leh Kristiante leh Zohnahthlakte tana thil tha lo tam tak an ti chungin MNF chuan an inzawmna a chhuchat ngam loa, an sum beiseiin ZPM pawhin do thu an puang ngam bik lo tih Congress vice president Lal Thanzara chuan a sawi.
Zirtawpnia Congress Bhawan-a political session-ah Lal Thanzara chuan, MPCC president Pu Lalsawta’n thahnemngai takin kan hnam leh sakhua himna’n Mizorama political party zawng zawng, kohhran leh NGO te chu BJP do a, Kristian sakhua nekchep tumtute dopui turin a sawm ngam laiin, inthlan hun atana BJP sum leh an chakna chhawr tangkai tum ZPM chief ministerial candidate chuan BJP do turin Zoram mipui a ngen ngam lo tih a sawi. “Mizorama BJP siam len tumin BJP an len theihna kalkawng tur a duanpui a, hetiang khawpa kan hnam min nuai lai hian BJP kan thawhpui loang, tih ka sawi thei lo, a la ti duh chauh a ni,” a ti.
Tuna MNF sawrkarin min thlenpui theih awmchhun chu leiba ngah ber state nih a ni, tiin, “Heti chung hian ram tana tangkai lo PAHOSS an sem a, nuaithum tiamin Rs.25000 an sem nel nual a. Nationalism sawi chungin damlo pawisa leh sawrkar hnathawk hlawh an batsak a, nationalism sawi chungin Zohnahthak unaute nasa taka sawisatu BJP an thawhpuina an chhuchat ngam loa, MNF nationalism sawi leh keini nationalism sawi hi a inang lo,” a ti.
Kumin kumtawpa inthlan tur chu kan hnam leh kan sakhua awmzel dan tur hriltu a ni dawn tih MPCC vice president hian a sawi a. State hrang hranga kohhran leh para-church hnuaia missionary-te dinhmun a him loin harsatna hrang hrang an tawh nasat zual thu te, Hindu sakhua chawivung tuma BJP hmalakna chu a tak taka vei a hun takzet thu te, kan sakhua leh hnam himna turin party-a kan awmna thlan dik a tul thu te a sawi.
“Manipur-a kan unaute nunna tam tak a ral a, chenna in leh lo tam tak tihchhiat sak an ni. Hmeichhiate zahawmna tih bawrhban sak niin Pathian biak in za tel tihchhiat a ni. Heti chung hian MNF chuan BJP a zawmna an chhutchah ngam loh avang hian kan hriat loh hlanin kan sakhua leh kan hnam lungphum hi sawinghin a ni mek. Kan ram, kan hnam leh kan sakhua himna tura thawk thei party kan thlan a ngai a ni,” a ti.