MNF MLA-te zarah SASCI sum lapse thu mipuiin hria – Er Lalrinawma

ZPM-in sum lapse awm lo anga thu an chhuah hnan vek tawh hnu ah MNF MLA-ten SASCI sum tih lapse a nih thu haichhuak lo se, mipuiin sum lapse a awm thu kan hre dawn lo tih MNF hruaitu Er Lalrinawma chuan a sawi.
Thawhtannia MNF office, Mizo Hnam Run-a inkhawmah MNF general secretary Er Lalrinawma chuan SASCI sum lapse avang khan Mizoramin sum kan chan ngei ngei tur tam tak kan chán phah tih a sawi a. GST-ah ringawt cheng nuai 2000 chuang Mizoram sum bawma lut tur kan chán a, labour cess-ah tam tak kan chán bawk nia sawiin, “Hnathawktute inhlawhna tur nuai tam tak a luangral a. A uiawm tham takzet. Hei bakah hian veng leh khaw hrang hrangin hmasawnna an dawn tur, khelmual, community hall leh thil dang dang an neih loh phah teuh dawn a, a pawi hle,” a ti.
AMC corporator Chuauzikpuii pawhin kan ramah enge thleng a, kan sawrkar hian enge a tih, tihte mipuiin kan hre tur a ni, tiin, “Politics ngaihven hi a changkang a, khua leh tui tha chuan ram inrelbawlna kan ngaihtuah ngei ngei tur a ni,” a ti. Sawrkara tel kher turin party-ah kan awm tur a ni loa, khawi party-ah pawh awm ila sawrkar kalphung ngun takin kan zirin kan bihchiang ve tur a ni tiin a sawi.