MNF sawrkar tlak chhan hi Pathian remruat vang zawk – Zoramthanga

MLA inthlana MNF sawrkar tlak chhan chu Pathian remruat vang zawk a ni tih an party president Zoramthanga’n a sawi.
Zirtawpni, December 15 khan MNF office Mizo Hnam Runah Exodus Day leh Hnam Run kharna inkhawm neih a ni a. Lawmthu sawina leh sual thupha chawi tawngtai rualna neih a ni.
MNF president sawrkar kaltaah hrileng karah sum harsatna, core fund (non-plan) manganna an tawk zui a, central atanga an hmuh tur lokal lo cheng vaibelchhe 3000 vel chu leiba chhipchhuan ang reng a ni a, nasa taka beih an tawk a. Non-plan indaih lohna hi centre-in a hnawhkhat loa, indaih lohna hi phuhruk a ni loa, peace bonus chiah kha phuhrukna la awmchhun a ni tih a sawi.
“Hei vang hian beih kan tawk a. Development, candidate neih that pawhin awmzia a nei tawh lo. Pathianin kan phurrit min chhawk turin tuna sawrkar thar hi a ruat ta a ni,” tiin, MNF sawrkar tla chu Pathiam remruat a ni tih a sawi.
MNF kalkawngah hian Pathian remruatna chhiar thiam a ngai tih Zoramthanga hian a sawi a. Hei aia harsatna nasa zawk pawh lo thleng mah se, hnam thuthlungah nghet taka ding tlat turin party mite a sawm tih a sawi.
“MNF hi Pathianin chak takin a siam ngai lo. Dinhmun sangah min dah pawhin, min hnukthla leh thin, kan chapo loh nan,” a ti a. MNF-in politics kawng a zawh chhoh dan a sawi a ni.
MNF adviser Dr R Lalthangliana chuan hnam martar leh an chhungte bakah sawrkar thar leh mipui chibai a buk tih a sawi a. Khawvela hrileng leh hun khirh hmachhawn tura Pathianin MNF a dah chu lawmawm a tih thu a sawi. “MNF hi political party a ni mai lo, hnam party – hnam movement kengtu a ni,” a ti. MNF leader chu tun dinhmunah chuan MNF tana tha ber a nih thu a sawi bawk.