Mobile phone ruk a hluar

Mobile phone ruk a hluar
Police-te chuan tunhnaiah Aizawlah mobile phone ruk a hluar a, hralh leh tura ruk a nih thin avangin hetiang laka mipui fimkhur turin an chah tih an sawi.
Aizawl District Police thuchhuak chuan tunlai hian Aizawlah mobile phone ruk a hluar a, a rutute hian pawisa an mamawh avangin khawlaiah leh social media hrang hrangah a man pangngai aia tlawm uchuakin an zuarin an hralhchhawng thin tih a sawi. Mobile phone rukbo a tlem theihna’n, ruk a ni tih hriatchian/ rinhlelhawm ngawih ngawih (man tlawm uchuak taka zawrh, charger leh original package tel lo, pattern lock pawh hre lo adt.) chu lei lo turin mipui a ngen a. Khawlaiah emaw social media-a hetiang zuar hmu fuh chuan police station hnai bera report turin a ngen.
‘Ruk a ni tih hrereng chunga bungrua (property) eng chi pawh lei hi Indian Penal Code hnuaia dan bawhchhiatna a ni a. Section 411 IPC (dishonestly receiving stolen property) hnuaiah thubuai siam theih a ni. Awlsamtea thubuai neih theihna laka fimkhur a, rukruk hluar zel tur venna kawnga thawhpui turin Aizawl District Police chuan mipui a ngen a ni,’ a ti.