Modi-a’n Congress PM-ten ram dang parliament-a an sawi zat thu sawi ta

Modi-a’n Congress PM-ten ram dang parliament-a an sawi zat thu sawi ta
Prime Minister Narendra Modi-a chu ram hrang 17-te parliament-ah thu a sawi ta a, Congress prime minister awm tawh zawng zawngte an sawi zat a tluk ta.
Modi-a hian Nilaini khan Parliament of Namibia-ah thu sawi lehin hei hi ram dang rorelna in sanga a vawi 17 sawina a ni ta a ni.
Prime minister hi tun hnai khan ram panga – Ghana, Trinidad & Tobago, Argentina, Brazil leh Namibia tlawhin a zin a ni.
Congress-in prime minister a neih tawhte zingah Manmohan Singh-a khan ram dang rorelna inah vawi sarih sawiin a sawi tam ber a ni a. Indira Gandhi vawi li, Jawaharlal Nehru vawi thum, Rajiv Gandhi vawi hnih leh PV Narasimha Rao-a’n vawi khat an sawi.
Modi-a hian heng Congress prime minister panga a neih tawhte sawi zat hi a tluk ta chiah a. Kum 2014-a prime minister a nih tirh khan Australia, Fiji, Bhutan parliament bakah Nepal Constituent Assembly-ah thu a sawi a, heng hi a bul tanna a ni.
Kum 2015 khan Britain, Sri Lanka, Mongolia, Afghanistan leh Mauritius-ah a sawi leh a. Kum 2016-ah US Congress joint session-ah a sawi bawk.
Kum 2018-ah Uganda-ah sawi lehin a kum lehah Maldives-ah a sawi a. Hripui leng avanga ram intlawhpawh a harsat laia awlin kum 2023 khan US Congress joint session-ah a sawi leh a. Nikum khan Guyana-ah a sawi leh a ni.
Congress prime minister lo zingah BJP atangin Atal Bihari Vajpayee khan ram dang parliament-ah vawi hnih thu a sawi a, Morarji Desai-a’n vawi khat a sawi bawk.