Moon time zone neih ngei ngaiah ngai

European Space Agency (ESA) te chuan ram tin tena lunar base din belh zel an tum avangin Moon time zone rang taka siam ngei a ngai tiin an sawi.
European Space Agency (ESA) te chuan Earth’s natural satellite te chuan time zone hran an neih a ngai tawh a, a chhan ber pawh nakin zela spacecraft te chuan inbe pawp tawna thawhhona tha zawk an kalpui theih a ngai a ni, an ti.
Pietro Giordano, navigation system engineer chuan mithiamte chuan ‘common lunar reference time’ space agency tena thlaa an hun hman dan kimchang leh fel zawka an hriat theihna tur chu an ngaihtuah mek thu a sawi a. “He mi atan hian ram hrang hrangte chuan hmalakna an kalpui mek a ni,” tiin Giordano chuan a sawi bawk.
ESA te chuan khawvelin common lunar reference time inang tlang leh pawm vek theih nakin zela lunar sysem leh users tena lungruala an hman theih tur a mamawh an ti a.
Sawihona pawh neih fo tawh niin ESA’s ESTEC (European Space Research and Technology Centre), the Netherlands chuan nikum November thla khan sawihona a lo huaihawt tawh bawk a. Khawvelin inang tlanga hman theih ‘LunaNet’ emaw neiin chu chu ram tin tena an hman theih tura chhawp chhuah ni se an ti.
“ESTEC meeting nehnaah common lunar reference time kan mamawhna kan sawi a, ram tin tena kan pawm theih tur leh inpelhsawlh lova kan ham tlan theih tur neih ni se kan ti a ni,” tiin Giordano chuan a sawi.
Tun dinhmunah chuan astronauts ten an ram time zone chu spacecraft enkawl nana an hman mai a ni a. Mahse, thlaa tum tum leh luhchhuah tuma nasa zawka kalpui mek zelah recording leh communication tha zawk a awm theih nana hun inang tlanga hman theiha siam chu pawimawha ngaih a ni.
Lunar time system inang tlang siam tur erawhin scientists te chuan technical issue chinfel tur la nei thungin, sana chu thlaah lei lam aiin ni tinin 56 microseconds in a kal chak zawk a. Hei bakah hian tickling pawh lunar surface aiin orbit ah a kal dan a danglam an ti bawk.
“Thla atan inlungruala working time system inang tlang kan nei thei a nih chuan planet dang luhchhuah zel nan pawh tha zawk kan nei theiin kan ring a ni,” tiin Bernhard Hufenbach, Moonlight Management Team chuan a sawi.