Morgan Wallen-a’n Billboard 200 chart record siam

Morgan Wallen-a’n Billboard 200 chart record siam
Country star Morgan Wallen album ‘One Thing at a Time’ chu Billboard 200 (albums) chart-ah kar 100 chhung, a zawn ni lovin top 10-ah a lang ta a, he chart top 10-a kar 100 chhung lang thei album pahnih a neihna niin, hetiang tithei awm chhun a la ni. A album hmasa ‘Dangerous: The Double Album’ chu December 2022 khan chart top 10-ah kar 100 tling tawhin, chumi hnuah pawh a la lan chhunzawm zel a, kar 158 top 10-ah a lang tling tawh a, solo artist album-ah chuan chart top 10-a lang rei ber a ni bawk.
Tunkar Billboard 200 chart-ah ‘One Thing at a Time’ hi No.9 a ni a, ‘Dangerous’ hi No.12 a ni bawk. ‘One Thing at a Time’ hi 2023-24 chhungin chart No.1-ah kar 19 chhung a lang thei a, ‘Dangerous’ hi 2021-ah khan kar 10 chhung a No.1 thei bawk.
Billboard 200 chart hi March ni 24, 1956 atang khan kar tin regular takin an tichhuak thin a, he chart top 10-a album lang rei thei ber chu stage musical My Fair Lady original cast recording niin, 1956-60 khan kar 173 chhung top 10-ah a lang. He chart top 10-a kar 100 chin lang thei hi album paruk chiah a la awm a, chung zinga pali chu cast recording emaw film soundtrack emaw vek niin, solo artist anga lang thei awm chhun chu Morgan Wallen chiah niin, ani hian album pahnih a nei a ni.
Billboard 200 chart Top 10-a lang rei zual te chu:
173, Original Cast, My Fair Lady, 1956-a tlangzarh
158, Morgan Wallen, Dangerous: The Double Album, 2023-a tlangzarh
109, Soundtrack, The Sound of Music, 1965-a tlangzarh
106, Soundtrack, West Side Story, 1962-a tlangzarh
105, Original Cast, The Sound of Music, 1960-a tlangzarh
100, Morgan Wallen, One Thing at a Time, 2023-a tlangzarh