Morgan Wallen “I’m the Problem”-in streaming record a siam

Morgan Wallen “I’m the Problem”-in streaming record a siam
He country superstar hi an che chhe deuhin, han dai pial deuh phat phat thinin, sawisel leh ensan te pawh tawk thin mah se rimawi khawvelah a huhang hi tuma beng hniam theih a ni lo tih a lang chiang telh telh a ni e. Morgan Wallen studio album palina ‘I’m the Problem’ chuan ni khat thil thuah streaming platform lian zual Spotify, Amazon Music leh Apple Music-ah te streaming record a siam nghal vek.
‘I’m the Problem’ album hi May ni 16 khan an tlangzarh a, he album hi hla 37 awmna niin, darkar 24 chhung lekin kumina country album stream nasat ber record a siam nghal a, Amazon Music-ah pawh ni khat thilthua country record stream nasat ber record a siam bawk.
Spotify pawhin X-ah “Morgan Wallen chuan country history a siam leh ta,” tiin ‘I’m the Problem’ chu Spotify-ah kumina country records stream nasat ber a ni a, Billboard pawhin album tlangzarh atanga darkar 24 chhunga kumina country albumn stream nasat ber record a siam nghal tih an tarlang bawk.
Mahse, hetiang hi Wallen tan thil thar pawh a ni tawh lo, 2023 khan a album, hla 36 awmna ‘One Thing at a Time’ chu mipa zaitiam album-ah chuan ni khat thil thu a Spotify-a country album stream nasat ber a lo ni tawh a, a album pawh hi Billboard 200 (albums) chart-a kar 19 a No.1 zui a, 2023-ah hian Billboard 200 year end top album award a dawng bawk.
Wallen hian 2021 khan a album ‘Dangerous: The Diuble Album’ tlangzarhin, Billboard 200 chart-ah kar 10 a No.1 thei bawk.
‘I’m the Problem’ album-a hla 22 te chu Morgan Wallen phuah leh a phuahtu zinga a tel ve vekna a ni a, he album a zaithiam lar hrang hrang a thawhpui zingah Tate McRae, Eric Church, HARDY leh Post Malone te pawh an tel.