Morocco lirnghing vangin nunna chan tam

Kar kalta Zirtawpni zanlaia Morrocco a lirnghing na tak avanga nunna chan chu sang hnih pel tawhin chhanchhuktute chuan theih tawp chhuahin chhanchhuah hna an la thawk zui zel a.
Interior Ministry chuan lirnghing avanga nunna chan an la pung zel dawna a lan thu an sawi a. Lirghing in sawi natna hmun kilkhawr zawkah te chanchin kimchang hriat theih a la ni lo.
Ministry chuan AL Haouz province ah nunna chan tam berin 1,293 an thi a, Taroudant in dawtin nunna chan 452 an awm an ti bawk a.
Hliam tuar 2,059 awm tawhin heng zinga 1,404 chu dinhmun derthawng taka awm tiin tarlan a ni bawk a. Sorkar chuan ni thum chhung nunna chan te sun tur tiin thuchhuah a siam tawh a. Kar kalta Zirtawpnia lirnghing chu 6.8 magnitude lai niin kum 120 chhunga North African-in lirnghing a tawrh nat ber a ni.
US Geological Survey te chuan lirnghing hi 6.8 magnitude-a na tia sawiin zanlai dar 11:11 ah a nghing a second eng emaw zah a sawi an ti bawk a. US agency te chuan a hnu minute 19-ah 4.9 magnitude aftershock a thleng zui leh tiin a tarlang bawk a. Lirnghing hi African leh Eurasian tectonic plate insiin a siam niin a nghinna a pawnlan em avangin a nat phah a ti bawk.
North Africa-ah lirnghing a thleng zen zen lo tiin Lahcen Mhanni, Head of the Seismic Monitoring and Warning Department at the National Institute of Geophysics chuan a sawia tun lirnghing hi helai region a lirnghing tawha na ber tiin a sawi bawk a.
Kum 1960 khan Moroccan coity of Agadit ah 5.8 magntude a nain lir a nghing tawh a, kha vang khan mi sang tamin nunna chan phah tawhin Morocco-ah construction rules siamthat a nih phah tawh a, mahse, building tam tak a bikin thingtlang lama in te chu lirnghing do zo thei tura sak a ni lo hrim hrim tin a ni bawk.

Israel-in tanpuina pe nghal dawn
Israeli Defence Minister Yoav Gallant cvhuan Moroccan thuneitute bia in Israel chuan mamawh ang a piang tanpuina pek nghal tur thu a hrilh a. Israeli sipaite pawh humanitarian aid lama thawk tura tirh luh an ni nghal dawn bawk.
Israel leh Morocco te hian kum 2020 kha inzawmna siam thain diplomatic leh security lamah inthlunzawmna an nei a. Moroccan Senate president Enaam Mayara cu Moroccan official hmasa ber leh Muslim leader tlemte Israel Knesset or parliament chhunga lut tlem te zinga tel tur a ni a, mahse, lirnghing avang hian a zin a thulh nghal lo thei lo a ni.
“Abraham Accords kan neih hmagin kan thawhpuite chu hun harsaah an tan kan ding tlat dawn a ni,” tiin Gallant chuan thuchhuah siamin a sawi a. Abraham Accords hi US hmalaknaa Israel leh Arab ram thenkhat tena inzawmna an neih a ni.

|anpuina pek nasat tum
US President Joe Biden chu world leader zinga North African kingdom of Morrocco-in lirnghing avanga harsatna a tawha tanpuina pek inhuam zingah a tel a.
Biden hian kar kalta Inrinni khan US official te chu Morocco be pawpa hma la turin a ti nghal a. “Morocco a American khua leh tui te him nan kan thawk nghal a, Moroccan te tanpui an ngaihna apianga pui thei turin kan inring a ni. Tun hun harsaah hian United States chu Morrocco leh ka thian King Mohammed VI kan thlawp tlat a ni” tiin Biden chuan a sawi.
Kumin kumtira lirnghing avanga mi sang chuang chana hloh nasa tak nei Turkey pawh tanpuina pek tum zingah a tel a. France leh Germany, Moroccan origins khua leh tui thahnem tak nei te pawhin tanpuina pek an tum thu sawiin, Israel Foreign Ministry chuan Moroccan officials te nena tanpuina pek dan turah an inbiak pawh reng thu an sawi bawk a.
Hetih lai hian Qatar chuan lirnghing nuaina hmuna awm te leh an indin thar leh nana tanpuina a pek tur thu a sawi nghal bawk a. King Abdullah II of Jordan pawhin tanpuina an pek tur thu a sawi bawk a.
Pope Francis chuan tawrhpuina thu thawnin chhiatna thleng an tawrhpui tak zet thu a sawi a. Francis hian kum 2019 khan Morocco hi a lo tlawh tawh a ni.
Algeria chuan humanitarian aid Morocco ah pek luh a tum thu a sawi nghal bawk a. Chu mai ni lovin Algeria chuan Morocco a humanitarian aid leh medical evacuation flight atan a airspace chu a hawn thu a sawi bawk. Algeria leh Morocco hi ram insi mai niin inngeih lo tak ni thungin kum 2021 khan diplomatic lam inzawmna an neih te pawh an chhu chat dun zawk a ni.
Algerian President Abdelmadjid Tebboune chuan Algeria chuan humanitarian aid pek luh a inpeih reng a, Mocroccan kingdom in rem a tih leh a tul angin hma lak a ni ang tiin a sawi bawk.