Moscow-a concert lai beihnaah mi 133 thi

March 22 khan Moscow a concert hall beihnaah mi 133-in nunna chanin hliam tuar tam tak an awm bawk a. Russian president Vladimir Putin chuan concert hall beihnaa inhnamhnawih mi 11 te chu man an nih tawh thu a sawi.
Putin chuan he thila inhnamhnawih mi palite chu man nghal an nih thu sawiin Ukraine ramri kan an tum laia man an nih thu a sawi a.
Islamic State group Afghanistan branch chuan thuchhuah siamin Moscow concert hall beih chu an tih a nih thu an sawi nghal a, US pawhin ISIS-K te thiltih ngei a ni tiin a sawi bawk.
Mocow concert hall beihna hi Russia a tharumthawhna tun hnaia thlenga rapthlak ber pawl niin Putin an tun hnai lawka inthlana chakna hneh taka a chan hnua a thuneihna a sawhngheh leh zual tan laia thleng a ni bawk.
Ukrainian President Volodymyur Zelesnky chuan Putin chuan tul hauh lovin Ukraine puh a tum a ti a. “Laktlakloh zet Putin hian a khua leh tui te thlamuan aiah nikhat tal tawp ngawih chuhin chhiatna thlenga Ukraine dem theihna ringawt a chhut a ni” tiin a sawi.
US National Security Council chuan tun thla tirlamah tawh Russia chu firfiak ten mipui punkhawmna te an bei thei tia an hrilh tawh thu an tarlang nghal a. Mahse, Kremlin chuan ‘propaganda’ tia sawi sakin Washington chu Russian inthlanah inrawlh tum tiin a lo puhlet zawk tiin an sawi bawk.
Concert hi veteran bns Picnic te huaihawt niin inkahna htlen lai hian hall chhungah mi 6,200 vel an awm tia sawi a ni a. “Kal pahin ngawi rengin an hmuh apiang an kap pawp pawp tawp mai a ni” tiin concert-naa tel ve Anastasia Rodionova chuan a sawi.
Concert naa tel tho Vitaly chuan, “Petrol bomb an vawm bawk a, kangmei a chhuak zui nghal bawk” tiin a sawi.
Islamic State group tena an Aamag news agency a thuchhuah an siamah chuan Moscow khawdaifem Krasnogork ah ‘Christian’ pungkhawm te beiin tam taqk tihlumin za chuang hliam in an awm bawk tiin an tarlang a.
IS te thuchuaha Christian te bei tia an sawi chungchangah IS expert Aymenn Jawad al-Tamimi chuan IS te strategy pakhat a nih thu sawiin ‘khawvel huapin ringlo mi an tih te chu a remchanna a pianga beih an thupui a ni tawp mai a ni’ tiin a sawi.
October 2015 pawh khan IS te chuan Sinai chungzawna a htlawh laiin Russian passenger jet an kapthla tawh bawk a, thlawhna chhungah mi 224 lai chuangina tam ber te chu Russian te Egypt a khualzina kal haw lam te an ni.
ISIS-K te hi Afghanistan mai bakah Syria leh Iraq bakah Africa-ah te pawh an che nasa hle a. Heng bakah hian Russia Caucasus leh region dangah te pawh tharumthawhna nei thinin an fihghter hi Russia ram chhung leh Soviet Union ram hlui atanga an lak deuh ber te an ni bawk.

-- Advertisement --

Tute nge ISIS-K?
US chuan intelligence report an hriat ang chuan karkalta Zirtawpni a Moscow a concert neihnaa mipui pawngkah vak tute chu Islamic State te an nih thu US official te chuan an sawi a.
Heng firfiak pawl te hi Islamic State Afghan branch ISIS-K an tih te an nih thu a tarlang bawk.

ISIS-K
Islamic State Khorasan (ISIS-K) hming hi Iran, Turkmenistan leh Afghanistan region hming hlui changchawia phuah a ni a, kum 2014 tawp lam khan Afghanistan ah indinin nunrawng taka an chetlak thinna chu an larna ber pakhat a ni.
Islamic State a inziaklut zinga active ber pawl niin kum 2018 a an tam vanglai a thlen hnuah ISIS-K te chu member an tlem tial tial thung a, Taliban leh US sipai te laka hloh an nei nasa a ni.
United States chuan kum 2021 a Afghanistan atanga a sipaite a lakchhuah hnuah extremist group ISIS-K te ang laka intelligence a neih chu a tlahniam tiin a sawi.

ISIS-K te lo chet tawhna
ISIS-K te hian chetlakna an ngah tawh hle a, chung zingah chuan Afghanistan ram chhung leh pawnah mosque te hial pawh an bei tawh thin.
Kumin kumtir lam pawh khan Iran ah bomb chak tak hmun hnihah tipuakin mi 100 chuangin nunna an chanphah tawh bawk a.
September 2022 khan ISIS-K te chuan Kabvul a Russian embassy chu suicide bomb hmangin an bei tawh bawk.
Kum 2021 han Kabul international airport beiin US sipai 13 in nunna an chanphah a, civilian nunna chan tam tak an awm bawk.
Tun thla tir lam khan Middle East a US general chuan ISIS-K te chuan US leh Western ram dang te chu bei mai thei dinhmunah an ding tiin a lo sawi tawh bawk.
March 22 a ISIS-K tena Russia an bei chuan boruak tang zawkin a siam ngei dawn a. ISIS-K te hi Russian President Vladimir Putin duhlo tute an ni.
“ISIS-K te hian tun hnai kum hnih chhungin Russia an thlurbing hle a, Putin leh a propaganda te chu an duhlohna langsar takin an tichhuak reng a ni” tiin Colin Cloarke of Soufan Center, Washington-based research group chuan a sawi.
Michael Kugelman, Washington-based Wilson Center pawhin ISIS-K te chuan Russia chu Muslim te rapbettuah a ngai a ni a ti bawk a. Hei vang hian Putin chu tun hma atang tawhin an hua a ti bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More