Motor insurance-a inbumna tam

Motor vehicle insurance-ah company lem an tam avangin mi tam tak an buai phah thin a, fimkhur a ngai tih Motor Vehicle Inspection hotute chuan an sawi a. FIR thehluh pawh a awm nual tawh tih an sawi.
Zawhna chhangin MVI hotute chuan, lirthei an endik thin atangin insurance fel nia inngai, Vahan-a endik a nih hnua lo fel si lo tam tak an awm thin a. Lirthei neituten an lirthei an insurance an tihna agent rinawm lo an awm thin vang niin a lang tih an sawi.
“Heng mite hian tlawm taka insurance ti thei nia insawiin, Rs. 7000 emaw 10000 emawa insurance lo leitirte an awm a, a hnuah lirthei neitute buaizui ta an awm thin. Insurance agent rinawm lo te hian rinawm anga inlantirin Vahan-ah kar khat te an update sak a, reiloteah a lang zui ta lo thin a; check an tawh a, Vahan-a insurance lo lang ta si lo, dan angin loh theih loa man an tawh phah thin,” an ti.
Lirthei document hi rampumah Vahan atanga en theih veka tarlan a nih tawh avangin Vahan-a lehkha pawimawh lang lo chu a valid tawh lo tih MVI hotute hian an sawi a. Lirthei neitute chu insurance a ni emaw an lirthei document emaw update tha tura an duh thu sawiin, man tlawm ringawt um loa rintlak ngeiah chauh an lirthei insurance ti turin an duh. Insurance dik lo an man zingah sumdawnna atana hman, commercial vehicle a tam tih an sawi bawk.
Lirtheiin a phurh theih aia tam phur (over load) chunga tlan lui an man thin chungchangah man tum hrim hram anga MVI an sawi thin chu thu dik lo a ni, tiin, man tum vang hrim hrim a ni loa, danin a phal bak aia tam phur chu man theih a nih bakah lirthei khalhtu leh mipui himna an ngaihpawimawh vang zawk a ni a, lirthei neitute leh a khalthute chu dan zawm hram hram turin an duh tih an sawi a ni.