Mount Etna kang a inphuh chhuak, meivap leh khu a tam
Italy-a Mount Etna chu a kang a inphuh chhuak a, meivap leh khu nasa takin a invawrh chhuak.
Sicily thliarkar atanga thlalak leh video darhah chuan Thawhtanni tuk khan tlangkang inphuh chhuak hi a darh nasa hle.
Thawhtanni tukah khan vawi tam tak ‘inphuh chhuak’ a awm tih Italy-a National Institute of Geophysics & Volcanology (INGV) Etna Observatory chuan a sawi.
Eng ang nasain nge a inphuh chhuah tih a la chiang lo va, a nasa tehchiam lo ang chuan a lang rih a. Thliarkara tumhmunah pawh thlawhna lut leh chhuak la tihbuai a ni rih lo.
Mount Etna hi khawvela tlangkang mek zinga langsar ber pakhat a ni a, inphuh chhuah pawh a nei zauh zauh a, thil tihchhiat tenau deuh leh hliam tawrh phah pawh an awm thin.
INGV chuan a inphuh chhuahna hi a chhim lam bung lai a ni tih a sawi a, a chhuahna lai hi metre 200 vela zau a niu.
Thawhtannia thlalak thehdarhah chuan maivap, boruakalhthei leh lung inpawlh, pyroclastic flow an tih chu a inphuh chhuahna sirah hian a luang thla tih a lang.
A viltu geologist-te chuan a inphuh chhuahna awng hi a chim mai a rinawm niin an sawi a, hei hian a hnuai lam awihah nasa takin a luantir thei dawn niin an sawi.
Pyroclastic flow hi a bul vel tan hlauhawm tak a ni thei a; mahse, tuna lang chinah hi chuan hlauhawm a la nih hmel loh.
INGV chuan pyroclastic flow hian Valley of the Lion an tih, khualzinten a chhip thleng tura an chawlhna hmun a la luan pel lo niin an sawi.
INGV chuan a inphuh chhuah hmasak ber hi Thawhtanni zing dar 12:39 (India-a zing dar 05:09)-ah a nih thu leh ‘Strombolian eruption’ an tih ang a nih thu a sawi.
Strombolian eruption-te hi a tlang chhunga thil awm azirin a innasat hleih thei hle a. Hetiang hi tlangkang chhunga boruakalhthei awm leh thil dang intikang atanga inphuh chhuak thin a ni.
Boruakalhtheite hi pawn lam boruakah a chhuahin nasa takin a puak thut thei a, a bul vela thil awmte van lamah a vawr vak thin a. Hetiang hi a bul hnaia thlawhna tumhmun vel tan a hlauhawm thei hle.
Thawhtanniah pawh khan red alert tihchhuah hman a ni a; mahse, a hnuah tihniam lehin thlawhna pawh a pangngaiin a thlawk thei.
Mount Etna kang inphuh chhuah hnuhnung ber chu February kha niin meivap tam lutuk avangin thliarkara Catania tumhmuna thlawhna lut leh chhuak tur tam tak hmun dangah tumtir an ni.
Khualzinte chu tlangkang atanga inphuh chhuak thil hnaih lo tura tih an ni bawk.
Mount Etna kang a inphuh chhuak, meivap leh khu a tam
Get real time updates directly on you device, subscribe now.