MP Fund bak sum haichhuah ka tum dawn – ZPM candidate

Lok Sabha inthlanpui atana ZPM candidate Richard Vanlalhmangaiha chuan MP Fund mai bakah central atanga scheme leh project awmte kan ram tan a tam thei ang ber hai chhuah a tum dawn tih a sawi.
Kolasib tlangdung a tlawhnaah Richard Vanlalhmangaiha chuan, chief minister Pu Lalduhoma kaihhruai ZPM sawrkar hnuaia kalphung thar kan hmu chho zel tih sawiin, sawrkar tha tichak a, state sawrkar nen pheikhai rual taka ke pen thei tur ruling party atang ngeia MP neih chu thil tul tak a ni tih a sawi.
State budget atang ringawt chuan hmasawnna liantham tam tak kalpui theihna tur sum kan nei loa, sawrkar inrelbawlna atan Mizoram budget tam zawk kan hmanral a ngai thin, tiin, sawrkar laipui atanga development fund awmte haichhuah kawngah taimak chhuah a ngai hle a, MP kan neih tawhte heihtawp chhuah thin tawh mah se, vawiina kan thlen chin chu mipuiin kan hria tih a sawi. “A ngaihna hria leh ram hmangaihna tak tak thinlung nena hna thawk tur MP kan mamawh a, chutiang mi chu nia kan hotuten min hriat avangin MP candidate atan min chhawp chhuak a ni. Pathian leh mipui zara thlantlin ka nih chuan ka theihna zawng zawng sawmkhawmin Pathian rinchhan chungin kan ram tan hna ka thawk anga, MP Fund bakah central atanga scheme leh project awmte kan ram tan a tam thei ang ber hai chhuah ka tum dawn a ni,” a ti.
ZPM chu regional party a ni a, central lamah eng party mah zawmpui an neih ve loh avangin central party liante tumah insalbeh tir an tum lo tih ZPM candidate hian sawiin, “Kan hnam leh kan sakhaw him nan theihtawp chhuah ka tum a, vote zawn nan erawh hman ka tum lo,” a ti.
Kolasib tlangdung chu Mizoram chakkhai dapna luhka pawimawh tak a nih avangin kawng hrang hranga tihhmasawn a ngai hle tih a sawi a. Tlangdung mipui pawhin theihna tam tak an nei tih a sawi. Heng hmasawnna kawng hrang hranga Kolasib tlangdung tan leh Zoram tan tih duh leh tih chak a neih ve te ti theia hnathawh kawr hak tir turin a beisei a, vote turin mipui a ngen tih a sawi a ni.