MP huaisen leh kawlhrawng kan mamawh – Lalruatkima

Kan hun tawn mek avangin Mizoten MP huaisen leh kawlhrawng kan mamawh lai tak a ni a, kan aiawha ding turin Pu K Vanlalvena kan mamawh tih MNF treasurer Lalruatkima chuan a sawi.
Nilainia thuthar thehdarhtute a kawmnaah MNF treasurer chuan, Lok Sabha MP candidate K Vanlalvena chu Mizo mipuiin kan hrechiang thawkhatin a lang a. Pi leh pute chhuan tur a nei ve loa, nu leh pa mi ropui chhuan tur a nei loa, Aizawl khawpuiah mi inhnuai luaha khawsa ve nawk nawk thin a ni tih a sawi.
“Hei erawh amahah kan hmu. Ram leh hnam vei mi, ram leh hnam hmangaihtu leh mi huaisen a ni a. Mizo hnam leh kan sakhua Kristianna chhan turin huaisena takin a bei thin a, a tlanchhe ngai lo,” a ti.
Hun kaltaah ram hruaitu chhuanawm tak takten Parliament rorelnaah kan ai an awh thin a, thusawina hun chan a harsatzia sawi nasat a ni thin a. Chutiang karah chuan Rajya Sabha member Pu K Vanlalvena chuan kum thum chhungin vawi 15 thu a sawi tawh tih a sawi. “Zoram mipuiin MP ngawi reng leh dakpu MP ni mai lo tur, thubuai nei mekte hnawl ngamin, kan hun tawngin MP huaisen, taima leh kawlhrawng kan mamawh a ni tih hriain, kan ram aiawh tur MP pakhat chauh kan neih avangin duhtui ang u,” Lalruatkima hian a ti.