MPL 10 – Aizawl FC in MPFC an lehthal

MPL 10 – Aizawl FC in
MPFC an lehthal
Zirtawpni khan MPL 10 round 4 khelh chhun-zawm a ni a, Aizawl FC chuan si phurh hmasak zet hnuin Mizoram Police FC an lehthal a, table-ah an lehpel zui nghal. Zirtawpni a inkhel dangah champion lai Chawnpui FC an chak zo lo.
Aizawl FC hian Mizoram Police FC lak bul an tan tha lova, goal an chhuah hma hle. MPFC hian minute 12-na lekah F Lalawmkima goal thun hmangin hma an hruai. AFC lakah hmahruai hma viau mah se goal an chhuah zui ve thuai a, minute 16-naah Lalrinzuala chuan goal thunin AFC si phurh a sut. Goal khat ve ve an thun hnuin goal dang a luh belh lawk thei lova, chawlhlawk hmain chungnung zawk an awm thei lo.
Chawlhlawk hnu lamah Aizawl FC in bul an tan tha ve thung a, minute 52-naah Lalrin-zuala’n an goal hnihna a thun a. Hun tawp dawn hnaih minute 84-naah KC Larchhuakmawia chuan AFC hmahruaina tizauin an goal thumna a thun. Hun tawp thlengin goal dang a luh belh tawh lova, Aizawl FC chuan 3-1 a hnehna changin point thum an hmu.
Mizoram Police FC lakah hnehna changa point thum an hmuh vangin Aizawl FC hian khelh li atangin point riat an hmu a, pathumnaah an inhlangkai. Aizawl FC in hma an sawn laiin MPFC erawh chu khelh li atang point 7 hmuin palinaah an tlahniam ve thung.
Zirtawpni a inkhel dangah champion lai Chawnpui FC chuan Chanmari FC an hma-chhawn a, inkhel hmuh-nawm takah goal lut a awm lo. Chanmari FC lakah chak zo lo mah se Chawnpui FC hian khelh li atanga point 8 hmuin pahnihna an luah chhun-zawm a. Chan-mari FC hian khelh li atanga point 10 hmuin, hma an hruai chhun-zawm ve bawk.