MPL-ah goal a sur, match 2-ah goal 20 a lut

LZ Juice MPL 11 chu September 18, Nilaini khan round 11 khelh tan a ni a, inkhel pahnihah goal a sur a, goal 20 zet a lut. 11-1 ngawta an khingpui FC Bethlehem sawptu Aizawl FC chuan an hmahruaina an sawh nghet a. Champion lai Mizoram Police FC in awlsam zetin hnehna an chang ve bawk.
Aizawl FC 11-1 FC Bethlehem
MPL 11-a khel tha tak, season kal mekah tlawm la nei lo Aizawl FC an khel tha chhunzawm a, round 11-a an khingpui FC Bethlehem chu 11-1 ngawtin an sawp. FC Bethlehem an sawp tum hian season kal meka player hmuhnawm Lalbiakdika chuan goal li a thun a. Bd-a hi Kuriz man of the match ah thlan a ni bawk.
An hmahruaina sawh nghet tura chak mamawh Aizawl FC hian table mawngphaha awm FC Bethlehem lakah an khel tha viau thawkhat a, a khingpui lakah goal 11 zet thun mah se chawlhlawk hmain goal thum chauh an thun. Minute 14-na lekah Laltlanzova chuan AFC hmahruaina goal a thun. Tlanzova goal thun atanga minute 10-naah Augustine Lalrochana chuan an goal hnihna thunin an hmahruaina a tizau a, minute 32-naah Lalbiakdika chuan an goal thumna thun zui leh bawk. Si thum ngawt an phurh hnuin FC Bethlehem tan Rohlupuia chuan minute 41-naah goal a thun a, an si phurh a sut then.
Chawlhlawk hnu lamah Aizawl FC an khel tha leh zual a, goal riat ngawt an thun belh. Chawlhlawk hnu lamah goat riat ngawt thun belh. Season kal meka player hmuhnawm, goal thun thei tak Lalbiakdika chuan minute 47, 48 leh 61-ah goal thunin hattrick a siam. FC Bethlehem lakah Biakdika hi man of the match ni phu in a inlan a, a aia hming dang chungnung reng reng an awm lo a ni ber mai. 7-1 ngawta hma an hruai hnuin AFC tan Lalawmpuia Sailo chuan goal hnih a thun a. Samuel Lalmuanpuia, C. Lalhriatpuia leh Augustine Lalrochana ten goal khat theuh an thun belh leh a, an khingpuite hi 11-1 ngawtin an sawp zui ta a ni.
FC Bethlem lakah nuamsa taka chak Aizawl FC hian MPL 11 round 11 thlengin tlawm an nei lo. Khelh 11 atanga point 27 hmuin pahnihna Chanmari FC lakah point 4 in hma an hruai fal. Chanmari FC hian vawiinah round 11 na an khel dawn a, an chak a nih chuan Aizawl FC nen an inkar a zim leh hret ang a, point khatin hnufual zawk an la ni ang. AFC lakah chiang zeta an tlawm leh tak vangin FC Bethlehem hian table mawngphah an luah nghet ve thung.
MPFC an chak leh ta
Champion lai Mizoram Police FC hi an hlauhawm lai ber chu an tlawm hnua an match hmasa ber a ni thin. Round 10-naah Aizawl FC hneh lovin an tlawm a, AFC laka an tlawm hnua an khelh leh hmasak berah an khingpui Sihphir Venghlun FC chu 7-1 ngawtin an sawp a, an hlauhawm hun ngaiah an hlauhawm chhunzawm zel.
Champion lai Mizoram Police FC leh MPL club thar Sihphir Venghlun FC te hian round 10 a zawh thlengin point 13 ve ve an hmu. Table-ah inthlau lo viau mah se khelmual chhungah erawh an inthlau ta viau thung. MPFC tan hian Lalfakzuala chuan minute 34-naah hmahruaina goal a thun a. Minute 45-naah Lalbiakthanga Hmar chuan penalty atangin an goal hnihna a thun a, 2-0 a hmahruai chungin chawlhlawk an hmang.
Chawlhlawk hnu lamah SVFC in bul an tan tha ve thung. Second half tan atanga minute hnihna lekah MPFC si nghak Lalmuanawma chuan an lamah a ti-goal a, SVFC si phurh a sut then sak. An goal thun vangin SV FC phur thar viau mah se an phur rei lova, MPFC in goal nga ngawtin an chhang let.
MPFC tan hian Michael Lalbiaksanga chuan minute 59-naah an goal thumna thunin an hmahruaina a tizau nawn leh. Hemi hnu hian Lalhmunmawia, Isak Malsawmkina, Lalfakzuala leh B. Rosangliana ten goal khat theuh an thun belh leh a, an khingpuite lakah awlsam taka hnehna changin point thum an hmu. Sihphir Venghlun FC an sawp tum hian MPFC tana khel tha tak Michael Lalbiaksanga chu Kuriz Man of the Match-ah thlan ni.
Pathumnaa awm mek Mizoram Police FC hian khelh 11 atangin point 16 an hmu ta chiah a, semi-final an hnaih deuh deuh zel. MPFC lakah tlawm chiang viau mah se SVFC pawh hi semi-final khel thei dinhmunah an la ding tho thung.