MPSC chhuina report thehlut

Mizoram Public Service Commission (MPSC) hna lak dana thil felhlel awm nia puh an nih chungchang chhuichiang tura Mizoram sawrkarin a ruat, Michael Lalmanzuala, IAS (Rtd) chuan April 24 khan a thil chhui report hi Vigilance secretary Betsy Zothanpari Sailo hnenah a thehlut.
MPSC hnuaia MCS Combined Competitive Examination 2023 leh hna dang laknaah thil fel lo a awm nia hria in Mizo Zirlai Pawl chuan, he thila mawhphurtu ber tura an ngaih MPSC chairman chu bang turin an phut a, a ban mai loh avangin April 15 atang khan MPSC hnathawkte pisa kai tur an dang zui a, April 16-ah pawh dang lehin, sawrkar chuan chhuichian a nih tur thu a sawi avangin pisa kai tur an dan hi an chawlhsan zui a ni.
Mizoram sawrkar Vigilance department chuan April 15 khan chief secretary hlui, MPSC chairman hlui ni bawk M Lalmanzuala chu he thil chhui tur hian a ruat a. Ruat a nih atanga ni sarih chhunga chhui zo hman tura tih niin, ni 7 chhung hian MPSC pisa pawh khar a ni a. Sawrkarin a beisei hunah chiah report hi a thehlut a ni.