MPSC exam-ah Mizo tawng middle standard tel zel dawn

MPSC exam-ah Mizo tawng
middle standard tel zel dawn
Mizoram Public Service Commission chuan a hnuaia exam buatsaih reng rengah Mizo tawng middle school standard qualifying exam atan a tel zel tawh dawn.
Thawhlehni khan Human Resources Development Board vice chairman Dr L Thangmawia chuan Mizoram Public Service Commission (MPSC) leh Mizoram Subordinate Services Selection Board (MSSSB) office a tlawh a, hmalakna leh hmachhawpte a sawipui.
MPSC office-ah hian chairman JC Ramthanga leh secretary Vanlalmawia ten lo dawngsawngin, hna lak dan tha leh mumal zawk an duan chu state sawrkar pawmpuina an hmuh tawh thu leh chutiang chuan kum thar atangin combined examination hrang hrang – Mizoram Engineering Service, Mizoram Health Services, Annual Examination for Group ‘B’ (gazette) posts leh Agriculture & Allied Services (technical) Examination nei tura an inbuatsaih mek thu an sawi.
MPSC-in exam a buatsaih reng rengah Mizo tawng middle school standard qualifying exam atan a tel zel tawh dawn tih an lo sawi bawk a. MLA hi MPSC office thuamthat nana Mizoram sawrkarin cheng nuai 460.28 tunhnaia a pek hmanga office an thuamthat mek an lo enpui a ni.
MSSSB office-ah hian chairman C Lalhuliana, member H Vanlalchuangi leh secretary David Lallawmkima Fanai ten lo dawngsawngin, kum 2020 atanga office luahin hna an thawk tan a. MLA hi an harsatna leh hmachhawp an lo hrilh a, office thar an nih angin hmasawnna tur tam tak la nei mah se, theihtawp chhuaha Mizo thalai hna zawnglaite tana an thawh zel tur thu an lo sawi a ni.
Office pahnih a tlawhnaah hian Dr L Thangmawia chuan, sawrkar laipuiin hna sang zawk la turin UPSC leh hna hniam lam latu tur Staff Selection Commission a neih ang dungzuia Mizoram sawrkarin hna sang lam (Group A & Group B gazette) la tura MPSC a din tawh bakah a hnuailam atan MSSSB remhre taka a din chu Zoram thalai lehkhathiam, hnazawng laite tan thil lawmawm tak a ni tih a sawi.
“Mizoram sawrkar hnuaia hnalak chungchangah MSSSB leh MPSC hi in la hmingtha hle in kan lo hria a, in hna lak danah sawisel tur awm loa, a tling tlak zel la chhunzawm zel turin duhsakna ka hlan che u a, thlai lehkhathiam leh mipui tana in hnathawh rawn zirchiangin a nakah ka rawn zen a ni,” a ti.
Covid hrileng karah MSSSB-in thalai leh sawrkar hnathawk mek mi 5231 te bung thar a kaipui hman chu thil lawmawm tak a ni tih a sawi bawk.