MRB-in nawrh zawm dawn

MRB-in nawrh zawm dawn
Central Trade Union-in sawrkar laipui hmalak mekna duhloha nawrh huaihawt a tum leh Regional Rural Bank-in anmahni kaihhnawiha thil phut an neih tih hlawhtlinna atana ram puma nawrh huaihawt tum chu Mizoram Rural Bank pawhin a zawm dawn a. Vawiin – July 9 hian Mizoram pumah MRB branch zawng zawng khar a ni ang.
Central Trade Union hian sawrkar laipuiin ‘Labour Code’ a siam chu an dodal a, hei hi Regional Rural Bank (RRB) ho chuan an thlawp ve dawn a ni. Mizoram Rural Bank hi RRB hnuai ami a ni.
RRB thil phut hi – Initial Public Offerings (IPO) kalpui tum hnuhdawh an duh a, RRB privatise tumna an duh lo. India ram state 28-a RRB chu apex body – National Rural Bank of India hnuaia dahkhawm; RRB-a hnaruak hnawhkhah a, SC/ST, OBC, hmeichhia, Persons with Disability leh ex servicemen tan kawng hawng zau zawnga thalai tan hna 30000 chuang siamsak dan ngaihtuah; RRB-a casual/part time leh daily-a thawkte dahngheh; Old Pension Scheme kalpui leh, tih te a tel a ni.
MRB an inkhar dawn bakah MRB Head Office, MINECO kawt ah City Area Branch bik chu an thil phut aupui turin an pungkhawm dawn a ni.