MRP Survey Report : Doctor Chêng Nuai Sawm Chawitir Thu
Lallunghnema
Charity Lodge
Cont: 9862288182
He Consumer Khawvela kan len lai hian harsatna hrang hrangin min tuam vel a. Chutih lai kârah chuan lawmna leh hlimna a lo tla zep bawk thin a. Chanchin lawmawm tak tak hriat tur a awm laiin chanchin duhhawm lo tak tak kan dawng thin bawk a ni.
Thil leitute tuarna hi ni tin darkar tin a thleng ve reng a nih hi!
Keini’n chanchin lawmawm kan tih chu: Consumer-ten Consumer-te hmakhua ngaia Consumer-te tana an beihna hi a ni a. Consumer-te hnen atanga chanchin duhawm tak hriat phei hi chuan a nuam leh zual a ni. Computer leituin a computer lei a chhiat avangin a complaint a, Computer zuartuin tha takin a thlawnin a lo siam thatsak a. Mobile zuartute chuan chu mobile chhe sa an lo hralh chhuak hlauh mai! chu mobile phone chu an siam that theih loh avângin mobile thar hlak an lo pe a. Television leitu nu pakhat chuan a TV lei chu a en that theih loh avângin TV hralhtu hnenah kalin thil awmzia a sawipui a. Chumi hnuah chuan tha takin a thlawnin an lo siam that sak a. Pheikhawk chungchangah pawh Pheikhawk Online Shoping neitu hnenah kalin a bun tâwk pheikhawk an lo ngaihtuah leh mai bawk a. Heng sumdawngho hi mi tha tak an ni a. Malsawmna an ni takzet a ni. Consumer-te hian kan dikna leh kan chanvo te kan hriat hian kan tuar loh phah a . Harsatna kan tawk lo nge nge a ni. Sum tam tak kan hum(saved) phah thin a ni. Mahni dikna leh chanvo hria apiang an him thin. An thlamuang thin a ni. Mahni dinhmun, dikna leh chanvo hria apiang an nihlawh a ni mai.
Sumdawnna khawvel leh Consumer khawvela kan indawrna a, thil lei leh hralhnaah hian Maximum Retail Price chungchang hian sawi a hlawh hle a. Mawlmang taka sawi chuan MRP kan tih fo hi India ram pumpui thil hralh theihna man (Price/Rate) ‘sang thei ang ber’ kan tihna a ni. Eng bungrua pawh hi MRP aia sanga hralh chhuah loh tur a ni a, hralh phal a ni lova, khap tlat a ni. He khapna thu hi The Legal Metrology Act 2009 (The Packaged Commodities Rule 2011) chuan chiang fahranin a tarlang a, MRP aia sanga thil hralh a khap a ni. A hralhtu chungah action lak theih a ni. He action lak theihna hi Legal Metrology Act 2009 chuan a tar lang a ni. Legal Metrology a thawk Officer-te chuan checking tih theihna power an nei a. Hrem theihna an keng tel bawk a ni.
Tun hnaiah mi thahnemngaite hma lâkna avângin Dawrkai leh Sumdawngte zingah ‘MRP aia sanga hralh loh ‘an intihhmuh ta nia hriat a ni a. He thuziaktu pawh hian Bazar hmun hrang hranga thil a lei dawnin mipuiin MRP an ngaipawimawh tan ta tih a hmu a. Amaerawh chu,MRP chiah chiaha thil hralh chu, dawrkaite hian thil ti tha riauin an inhria a. He ngaih dan hi a dik chiah lo va, bungrua eng pawh MRP aia hniama hralh tur a ni a. ‘Chiah chiah’ hi uar lutuk loh tur a ni! MRP hi hralhna tur Rate a ni lova.Hei aia sângin thil hralh loh tur tihna a ni zawk, ka U!
Legal Metrology kenkawh tur a ni a. MRP aia Sanga thil lei tu pawhin Cash Memo thil telin complaint theh luh theih a ni. Hemi chungchanga harsatna nei chuan Consumer centre hruaitute pan theih a ni.
Tin heti hi a ni a, Legal Metrology leh Centre For Consumer Education tangkawp chuan June ni 20.2025 khan Aizawl khawpui Bazarah MRP Survey hi an nei a, dawrkaiten an lo dawngsawng tha hle a. A hlawhtling thawkhat nia hriat a ni. He Programme tihlawhtlung tur hian Legal Metrology Inspector leh a naute an telin Centre For Consumer Education atangin mi 4 an tel bawk a. He Programme neihna dawr hrang hrang thawh chhuahnaah hian Consumer leaflet ‘Mipuite hnena ngenna leh hriattirna’ sem chhuah a ni bawk. An tlawh zînga Dawrkai mî hriat hlawh tak takte pawh an lo inhawng hle a. An thil zawrh laite chu MRP aia hniam fêa an hralh thin thu heta thawk chhuakte hi an lo hrilh a ni. MRP hi Mizote hian an dah pawimawh sawt hle tih chu an hmuh dân a ni a, MRP zâwm lo erawh an la tam hle ang tih a rinawm. MRP ngaih pawimawh hi rinawmna leh dikna lan chhuahna a ni a. Sumdâwng tha zia a ni . Consumer-te tan malsawmna a ni bawk.
Tichuan, Mizorama Consumer- te hriat nawn fo tur chu damlote hi Consumer an ni a. Hospital-te, Doctor-te hi Service petute an ni. Damloten an service an leisak a ni. He Consumer Commission thutlukna pakhat hi i lo thlir lawk teh ang.
National Consumer Deputes Redressal Commission chuan State Consumer Commission Judgement chu pawmpuiin Doctor pakhat chu cheng nuai sawm (10,00,000) zet a chawitîr tih Law Live chuan a sawi a.
He Doctor hian naute duhawm tak hi a zai chhuak a. A zaina (Operation) lamah naute lu vun chu a hîk (Scalp) a. Hemi chungchangah hian naute chhungte chu an lungawi thei ngang lova, Consumer Commission hnenah an zualko ta a ni. Delhi State Commission chuan Judgement siamin he doctor hi cheng nuai sawm thum chawi turin a ti a. Doctor hi National Commission-ah a zualko ve leh a. Mahse a hlawhtling ta chuang lova, a chawi tur zat erawh tih tlemsakin Rs 10,00,000/- (chêng nuai sawm )chawi turin a ti ta a ni. He Judgement hi ral khat thil thu mah ni se, CONSUMER RIGHT AWARENESS atan ka han ziak a ni.
Thil lei leh service hmannaa lungawi lo chuan min be thei e, mahse, huaisen leh rinawm a ngai.