MSL X final, Game 1 – TBL in BCA an chhuk en

Sharda Mizoram Super League X finals, best of three series game 1-na April ni 22 zana khelh zawh takah khan Khatla TBL in Zarkawt BCA chu 78 – 73 in an hneh – tun zirtawpni zan dar 8:30 pm hian game 2 khelh chhunzawm leh tur a ni a, Zarkawt BCA in Khatla TBL hi an chelh zawh loh chuan MSL X nomawi chu TBL Bhavan lamah a lêt ve leh tawh ang.
Hming pahnih
Inkhel beisei pha lo leh khaihlak ninawm zet karah stadium chhungah mipui an pungkhawm a; hming pahnih langsar an awm – a boral ni – June ni 8, 2024 thlenga Khatla TBL chairman, Pu R. Malsawmtluanga (Tluangtea) sunna hun khunkhan taka hman a ni. Kan sun tak Pu Tluangtea khan tawngkam tawi te thuk tak, “thalaite kawng kan sial sak ve theihna alawm!” tiin sum lama hloh chung pawhin Khatla TBL kaltlanga nun awmzia thalaite khawhhmuh kha a hlenchhuak a – a lei taksa kan zingah awm tawh lo mah se, Mizoram Basketball chhungkua leh Mizo infiamna khawvela dak chhuak pha chin chuan Pu Tluangtea kha a nghilh ngai tawh lovang!
Hming dang pakhat chu Emmanue V.L Awmpuia, league round lama tum thum player of the match ni thei – an club elpui lian ber Zarkawt BCA hmaa Mizo tlangval kut hmui (hot hands) hah thei lo, tum thum a zawn zata 3 pts a luh avanga inkhel hun tawp hnaih boruak sang tak kara inkhel thlak thleng hlawktu khan ‘the silent killer Emmanuel’ tih hming a hlawhchhuak chiang teh e! Finals, game 2 ah, ball a tawh apiangin ‘MVP’ tia au an awm a nih pawhin, he nau ngawi renga a hma bak hna chingfel thin hian a phu – a phu thlawt!
Thluak indona
Khatla TBL head coach Mapuia hian a player a hrechiang – a hre bel hle! Tlan hlei thei lo sek phiar tung, Yadu (Y. Singh) hi mi tam tak tan chuan bang sira damdawi thi tawh (expired) ang mai tangkai lo a ni; mahse, he coach ngawichawi tak hian semi finals atang tawhin an tumpuite player tha ber thluaka inkhel hlei thei lova sapatal buai nuai turin a rawn chhuah thin a, Yadu hian Zarkawt BCA player chhuanvawr Zonuna a nghawk salh lai hmutu te kha chuan Zemabawk BC innghahna Perkins Jr. a lo dah that tawh dan te thlirlet chuan a hmuihmul buk chhup nen hian eng emaw chu a hlen tlat!
Zarkawt BCA head coach, Marc Tetea Sailo hi doctor ni lo mah se, a players erawh an damlo – an dam kim mawlh lo! MVP ni ngei tura rin, Lalrina Renthlei chu a tluk sual avangin lak chhuah a ngai hial! MVP ni lai R-a lah 100% lovin a awm bawk! Dam reng thung si, ball pass nachang hre lo fit tung American val Cunningham hi ball a chan chiahin a damlo thung tlat zel! A kutah hian thirhipthei awm se, ball hi thir ni bawk se – chutiang vela a kut leh ball inchar bet nghet tlat, a teammate tualchhung player tha te tana khelhpui har player dam, damlo tel si a ni! Zarkawt BCA hian finals, game 1-ah khan an score thei – Cunningham la chhuakin pa sang Patel-a fit 6’10 kha dah lut se, 3 pts shooter Justin an la nei cheu!
MSL X finals, game 1!
Khatla TBL captain, full time khel thazuala (10 pts) hi team player a ni a – heti taka Emmanuel-a a rawn par chhuah theihna tura kaihruaitu tha a nih zia inkhelh laiin a hriat thin. An foreigner James hi professional player ze dik tak nei, bawnghnute vil loh chhuan liam phul hlut ang maia so bulh bulh ve lo, MSL X a hnam dang player tam zawk ang lo tak a ni – a hun te ah mamawh chhanna a ni. Thianga leh Dede-a hi tharum ngah an ni bawk a, an defense hi an coach Mapuia tan thlamuanna tham a ni tih a lang. Point neih tlem chang pawha Lsa taimakna hi kum lama naupang zawk te entawn tur a ni.
Zarkawt BCA tan Zonuna hlut zia hi an club inkhel en tamin an hre chiang ang. Chak lo mai tawh tur anga an lan lai, hun tawp hmawr lama 3 pts a zawna tum hnih a neih te kha player tha inlar hun a ni a, point guard ball fing sem chhuak nasa hi court pawn lama zakzum tak, court chhunga puitling ni ta bawk a ni! MSL X duhthusam lo R-a tan a ni chhunzawm zel a, player khel tha tluang pawl tak Matthew Sailo (14 pts) hian basketball chawlh san suh se – a theihna hi Mizoram basketball hian a la mamawh. A rei tial tiala Tamilnadu kristian tlangval, point 18 lai nei thei Justin (the silent shooter) hi innghahna tham a lo ni!
Khatla an lam, Zarkawt khawnge?
Khatla TBL hian tawiawmtu an nei tha thlawt zel. Semi finals atang tawh khan court side ticket an lei zawh nghal duak thu hi a ri ring thin. Veng pawn atangin hman ata tawh fans an ngah chu thuhran ni se, an veng club tawiawmtu hi an tam filawr viau zel.
Veng pawn atanga Zarkawt BCA fans fuankhawm karah an veng mite hmuh tur an awm pheuh thin. He club hi mipuiten an player chawk luh tha rualte hi hlut teh mah se, an vengchhung mipuiin MSL X ah ngat phei chuan an tawiawm tha tawk lo zual! Mizoram basketball inpuiah hian basketball in mual a liam tan mek, BCA club hi an veng hmel lanna leh hming thatna chelh dingtu a ni a, khawnge Zarkawt mipui? Game 2 ah hian an veng zia, intawiawm dial dial thin kha lang tak maw?
Hoops Mania Time Out
Inkhelh tan hun dar 8:30 pm hi a tlai hret! A tuka hunbi neia hnathawk tan a hmun panna hla tak hisapin in lama atanga lo thlir mai a manhla zawk thei. Kartawp leh kar lai hawl hi inkhel en hun inang thap kher hi mipui mar dehin a fuh lo!
Sei leh rei deuh, inkhel khaihlak fo, semi finals leh finals inkar awl zau tak – mipuiin MSL X an hlut zawk nan chinfel theih vek a ni.
Heng karah hian lawmna tur a awm. MSL vawi 10 zet, kum 2015 a bul tan tawh heti tiata a la lian leh bawr a la hlawh hi mi inpe te vang a ni. MSL X hi zo se, hei aia tha zawk hi MSL puipa lama thluakbur (think tank) rualin rawn chhawpchhuak mawlh teh se.
Khatla TBL lama MSL X nomawi tawlh hnai mek hi dang turin Zarkawt BCA hi inchingfel thei tak maw?