MSL X league round zo Zarkawt BCA + Zemabawk BC = Overtime 3:03!

Sharda Mizoram University league round khelh zawh a ni ta. April ni 2, nilaini zana inkhel hmasa zawkah Zarkawt BCA in Zemabawk BC chu 89 – 86 in hun pangai zawh hnu, minute nga hun pek belh (overtime) ah an hneh hram a, kai thar Zemabawk BC tan match official thutlukna pai dam a har ang – he thu ngai tho hi Zarkawt BCA tan pawh sawi tur a awm ang.
Anni team pahnih hi semi final lut sa ni tawh mah se, inkhel hmuhnawm lawr lakah hian tlawm zawk nih tum lo ve ve an ni a, basketball ngaina tan inkhel khel zui hlawh a ni reng tawh ang.
Inkhel hnuhnung zawkah MSL X zin kawng zawh fuh lo, hneh nei lova match ruk chhung zet hun harsa leh khirhkhan hmang tawh Bungkawn LB leh Electric BC an intawng ta a, 95 – 82 in Bungkawn LB in hnehna an chang a, an player \ha Ruatkima (18 pts) chu player of the match a ni.
Anni team pahnih bakah Saron BC leh Champhai BC te hian relegation battle rothap an hmachhawn zui ang a, anni club pathum a\ang hian hnehna chang vek club pakhatin MSL an cham chhunzawm ang a, club pathum erawh D league lamah an tla thla ang.
Double Z
Zemabawk BC-in bul an \an \ha lo, an tualchhung tlangvalte theihna lang thei lova mahni hmasial taka khel Perkins Jr. an amahin tih viau tum mah se, a thei lo – team game ni hek!
An coach Sangpuian an palian Perkins hi 1st. Qtr. tawp lam minute 3:26 a lak chhuah laiin 4 – 18 in an hnufual! Zemabawk BC-in ball an in pass kual a – Jacob-an 3 pts a rawn kut thaih a, Beniwal-an 2 pts vawi thum a rawn nei zui nghal zat a, Lman 3 pts hlu tak a nei ve bawk. Team game khel Zemabawk BC in Zarkawt BCA game an chelh ding a, minute thum bawr lekah point 12 hlu bik an nei thei mai – Perkins Jr. hi chhawr thiam a ngai tih a lang fiah!
Lallianmawia leh Beniwal ten point 14 ve ve an neih zan hian, 1st. qtr. lama bul \an \ha lo Perkins Jr. erawh 2nd qtr. a\anga a rawn inlan leh hnuin a thluakah Zemabawk BC boss in thil tuh a nei tih a hriat a, point 45 lai a nei zui thei.
Zarkawt BCA lam pawhin kaihhruai ngai zet foreigner Cunningham (28 pts) an neih hi team tan aiin a mimal tan \hahnemngai zawk riau hmuh theih a ni fo.
Heng karah hian tualchhung top player an kawlte erawh an khel rei tual tual a, team game an rawn phochhuak chhunzawm zel e.
Player of the match Lalrina Renthlei (26 pts) in 1st. qtr. tawp ruala 3 pts a neih kha player \ha bik te tana serhhran a ni.
Over time ah Khatla South tlangval Hmachhuana (12 pts) a tal na hle a, team khaipa leh an captain palian Matthew Sailo (11 pts + rebounds) hi dang chattu hrawl a ni – ani khel hi chu chik taka inkhel en tan bik a hlut zia hi an hria ang.
Hoops Mania Time Out
MSL X-ah hian match tinah ‘Player of the Match’ thlan \hin a ni. He chawimawina hian lawmman a keng tel a, chumi chu mi thilphal leh \hahnemngaite’n an rawn thawh \hin a, anni @tt_aizawl mini trophy, @white_walker_shoecare leh @badass_culture merchandise te hi hahipa fak phu te an ni.